La stagiun 2021/22 ha cumenzà bain per il skiunz Gianluca Böhm. Il giuven engiadinais fa part al center da prestaziun naziunal NLZ ed absolva cursas da la Federaziun internaziunala da skis (FIS) en las disciplinas slalom e slalom gigant. Malgrà ch’el haja gì ina stad stentusa ed uschia ina preparaziun difficila causa problems da sanadad – ha il giuven da 21 onns pudì cuntanscher diversas plazzas da podest. Per far il pass e daventar part d’in cader da Swiss-Ski, manca ad el però anc in u l’auter punct. Perquai è la participaziun al campiunadi svizzer fitg impurtant per il Samedrin che fa daspera in studi d’economia e lavura en ina butia da sport. La finamira saja da sa focusar sin las cursas e mussar ina buna prestaziun.
Cumbatter cun ils megliers
Da pudair absolver la fin da la stagiun cursas avant porta-chasa a San Murezzan, e lura anc cumbatter cun ils megliers atlets, saja in’aventura speziala. Impurtant per Gianluca Böhm è però tuttina da sa concentrar sin las cursas e cumbatter per mintga punct.
