Siglir tar il cuntegn

Header

cuntegn

Swiss Bike Cup a Gränichen Vital Albin va da success a success

Vital Albin ha gudagnà il classicher da mountainbike a Gränichen en il chantun Argovia, ina cursa dal Swiss Bike Cup ch'è vegnida organisada per la 30avla giada. La cursa dals umens d'elita è stà in vair crimi. Suenter l'emprima runda eran gist 11 mountainbikers a la testa. Silsuenter han Joel Roth ed Andri Frischknecht augmentà il tempo. Sulet Vital Albin ed Anton Cooper da la Nova Zelanda han pudì restar sin ils chaltgogns a quest duo. Frischknecht, il figl da la legenda Thomas Frischknecht, ha lura attatgà sco emprim. Grazia ad in conter spectacular ha Vital Albin dentant pudì surpassar Frischknecht e la finala cuntanschì l'arrivada cun in avantatg da 6 secundas sin Frischknecht e 19 secundas sin Roth.

Oz ha simplamain tut constà. Mia furma, mia tactica e l'avair pazienza fin la davosa runda.
Autur: Vital Albin mountainbiker

Per Vital Albin èsi l'emprima victoria en ina cursa da la pli auta categoria, ina victoria ch'el ha pudì festivar grazia a blera pazienza. Suenter il titel da vice-campiun svizzer l'entschatta zercladur a Leysin en il chantun Vad e sia emprima plazza da podest en la cuppa mundiala avant in'emna a Leogang en l'Austria è quei in ulteriur grond success per il mountainbiker sursilvan da 23 onns. Betg a la partenza èn stads Nino Schurter e Mathias Flückiger, il collega d'equipa d'Albin.

Vital Albin
Legenda: da san. Luke Wiedmann (4.), Andri Frischknecht (2.), Vital Albin (1.), Joel Roth (3.) ed Anton Cooper (5.). mad

Nov leader dal Swiss Bike Cup

Grazia a questa victoria ha Vital Albin er surpiglià la testa dal classement general dal Swiss Bike Cup. Segund è da nov Andri Frischknecht ch'ha gudagnà la stagiun passada quest classament general. La fin avust spetga anc ina cursa a Basilea e l'entschatta october stat sin il program la cursa finala a Gstaad.

Las proximas emnas è Vital Albin en in camp da trenament a San Murezzan en l'Engiadina per uschia sa preparar a moda optimala sin las cursas da la cuppa mundiala da chasa dals 8 fin ils 10 da fanadur a Lai.

RTR novitads 06:00

Artitgels legids il pli savens