Gia per la novavla giada fa la cursa Swimrun ÖtillÖ fermativa a Silvaplauna. Curriduras e curriders èn sa mesirà en trais differentas categorias en il nudar e currer. Era teams indigens èn stads da la partida.
La cursa Öttilö è naschida en Svezia
La disciplina Swimrun, pia nudar e currer, è ina giuvna disciplina. L’idea per uschè ina cursa nua ch'ins noda e curra dad ina insla a l’autra è naschida en Svezia. Cumenzà ha quai cun ina scumessa. In per amis han scumess dad esser il pli spert sin ina tscherta insla. Ins sa dentant mo nudar e currer fin tar quel lieu. La scumessa n'è gartegiada a nagin da quels che han mess patg. Dentant era naschida l’idea per in nov sport: il swimrun.
Pudair dar enavant la fascinaziun per quest sport a giuvnas e giuvens è la pli bella paja.
Cumenzà sco nudadra da salvament
Susanne Reisinger da Bever ha fatg sia emprima experientscha cun il Swimrun a Silvaplauna sco voluntara. Ella gidava sco nudadra da salvament. Spert è dentant creschì il giavisch da far part sez a la cursa. Sco instructura da nudar e passiunada curridura era quest nov sport precis quai ch’ella vuleva. Uschia ha la sportista cumenzà cun il trenament per questas cursas. L’emprim ensemen cun ses um, alura persula, u sco tar las cursas a Silvaplauna ensemen cun ina giuvna partenaria en in team da dus. Susanne Reisinger ha pudì motivar er a sia amia Christina Pinggera da Zernez dad empruvar quest sport. E dapi dus, trais onns fa er la scolasta da nudar da Zernez part al ÖtillÖ.
Motivar giuvnas e giuvens dad far quest sport
Ina da las pli bellas experientschas è per las dunnas da vesair sco las giuvnas ed ils giuvens han gust vi da quest sport. Far insatge ensemen cun in partenari, u cun ina partenaria giuvna è insatge tut spezial e segira era ina da las forzas che tira. Uschia fan Susanne Reisinger e Christina Pinggera la cursa gia per la segunda u terza giada cun ina giuvna partenaria. Ensemen van ellas sin il traject e partan uschia las aventuras da cumpagnia.