A chasa en il Grischun è la skiunza engiadinaisa Vanessa Kasper sgulada. Tar la cursa da la cuppa mundiala a Lai l’onn 2018 ha ella rut la stgaina ed il oss dal ventrigl. Ditg n'ha ella betg pli savì ir a la partenza da cursas da skis. Plaun a plaun s'ha la skiunza da 24 onns dentant puspè cumbattì enavos. L’emprim cun cursas da la cuppa europeica, lura cun cursas da FIS e per finir lura era cun cursas sin livel da la cuppa mundiala. A la fin da la stagiun passada cun grond success. Tar l’unica cursa da la cuppa mundiala ch’ella ha savì participar la stagiun passada è ella gist vegnida 21avla. Grazia a quel bun resultat ha ella pudì cuntinuar en la cuppa mundiala.
Cumenzar la nova stagiun sin il pli aut livel
La premiera da la nova stagiun e stà tradiziunalmain il slalom gigant sin il glatscher a Sölden. Tar l’emprima cursa da la nova stagiun n'ha Vanessa Kasper betg fatg il pass tranter las meglras trenta. Ella è dentant restada en il chalender da la cuppa mundiala. La proxima fin d’emna sa la skiunza er ir a la partenza da la cursa da la cuppa mundiala a Lech/Zürs en il Vorarlberg. Quai è ina cursa parallela, ina premiera er per Vanessa Kasper.
Finamira da mussar bunas prestaziuns en la cuppa mundiala
Il slalom gigant è la disciplina da parada da la skiunza engiadinaisa. Durant il proxim enviern vul Vanessa Kasper mussar bunas prestaziuns en la cuppa mundiala, dentant er adina far cursas in livel pli bass en la cuppa europeica. Tar questas cursas vul ella ir per la fiduzia en sasezza. Cun quel sentiment en il venter va quai meglier da purtar prestaziun er en la cuppa mundiala. Vitiers less la skiunza era s’avischinar a las disciplinas spertas, uschia ch'ella vegn er a far cursas sin las lattas lungas dal Super G.
Ord l'archiv:
Vanessa Kasper trenescha puspè.
