Medaglias, sche pussaivel da quellas dad aur, èn era la finamira dal traidubel campiun olimpic Dario Cologna. Dal davos campiunadi mundial avant dus onns en la Val di Fiemme è Cologna turnà cun aur ed argient. Sch’igl dat era questa giada medaglias, quai udis mintgamai en l’actual da la saira.
27.02.2015
Igl è il cumbat da las naziuns – la staffetta al campiunadi mundial da ski nordic a Falun. Sco gia ier tar las dunnas spetg’ins er oz tar ils umens il grond duel dals vischins, la Norvegia encunter la Svezia. Il pli tgunsch savess anc la Russia tartagnar la festa a las duas grondas naziuns nordicas. Betg tar ils candidats da medaglia tutga la Svizra. Tant pli che la Svizra sto desister da Curdin Perl ch’è blessà. Tuttina parta il quartet svizzer cun ambiziuns a la cursa da 4 giadas 10 kilometers. Ina plazza en ils top 6 è la finamira.
26.02.2015
Segunda schanza per Simon Ammann da gudagnar ina medaglia al campiunadi mundial da ski nordic a Falun. A las 5 ha la concurrenza da siglir sin la schanza gronda cumenzà. Simon Ammann parta cun il numer 40. Ha Simon Ammann propi ina schanza da gudagnar ina medaglia?
25.02.2015
Ils passlungists svedais vegnan meglier e meglier en furma al campiunadi mundial a chasa a Falun. Suenter la medaglia dad aur da Charlotte Kalla, hai oz puspè dà aur. En la cursa sur 15 kilometers en stil liber ha Johan Olsson gudagnà, quai avant il Franzos Maurice Manificat. Plirs favurits n’èn dentant betg vegnì a frida cun las grevas relaziuns sin la loipa pulit loma a Falun. Dario Cologna è vegnì 18avel, betg quai ch'el aveva spetgà. Ma ord vista Svizra hai tuttina anc dà in punct positiv; Toni Livers da Trun ha cuntanschì il 15avel plaz.
24.02.2015
Duas svizras en las top 10 ed in triumf svedais. Charlotte Kalla ha procurà per l’emprima medaglia d’aur svedaisa al campiunadi mundial da ski nordic a Falun. La Svedaisa ha gudagnà la cursa da 10 kilometers en il stil liber avant las duas americanas Jessica Diggins e Caitlin Gregg. Nathalie von Siebenthal è 6avla, Seraina Boner 9avla. In debachel hai dà per las favuritas da la Norvegia. La defensura dal titel Therese Johaug è 27avla, la dominatura dals davos onns Marit Björgen è schizunt mo 31avla.
23.02.2015
Rumantsch è IL linguatg en la scena svizra da cursa lunga. Er al campiunadi mundial da ski nordic a Falun. Per la staffetta svizra da venderdi che vegn era schizunt previs ina staffetta mo cun atlets rumantschs. Dario Cologna, Toni Livers, Jonas Baumann e Curdin Perl. Ma sco vus savais probabel, na datti uss tuttina betg ina staffetta exclusivamain rumantscha. Curdin Perl è crudà mo in’emna avant il campiunadi mundial, ha rut il clavigl ed ha perquai stuì star a chasa. Remplazzà vegn el dad Ueli Schnider. Ensemen cun ils 3 rumantschs Dario Cologna, Toni Livers e Jonas Baumann forma il lucernais uss la nova staffetta svizra.
20.02.2015
El seglia puspè – noss Simon Ammann, il quatterdubel campiun olimpic da siglir cun skis. In mais e mez suenter che Ammann è crudà grev en la conc urrenza da siglir a Bischofshofen è el enavos. Gist en il dretg mument. Gist per il campiunadi mundial da ski nordic a Falun. Damaun è l’emprima concurrenza da siglir, quella sin la schanza pitschna. Ma per Ammann vegni gia oz serius. Per insumma dastgar prender part damaun, sto Simon Ammann l’emprim cuntanscher oz la qualificaziun.
19.02.2015
En l’emprima cursa al campiunadi mundial da passlung a Falun en Svezia cumbattan ils sprinters per las emprimas medaglias. Per la Svizra èn da la partida il curridurs Gianluca Cologna, Jovian Hediger e Ueli Schnider. Per il Jauer Gianluca Cologna è il sprint classic atgnamain la disciplina preferida. L’emprova generala ad Östersund n’è betg grategiada. Cologna di dentant ch’el sa sentia bain ed il tschancun da cursa a Falun saja fitg differents a quel dad Östersund.
Tar las dunnas è cun Laurien van der Graaff mo ina Svizra a la partenza. Il sprint classic n’è betg sia disciplina preferida, ella curra pli gugent el stil liber. Sia finamira è perquai da sa qualifitgar per ils quart finals.