Siglir tar il cuntegn

Surselva Jam 2018 Crazy trics ed anc pli crazy nums

En il mund da freestyle datti nundumbraivels nums per differents trics, grabs, rotaziuns e cumbinaziuns da quels. Qua ina survista dals pli curius nums da trics ed in'emprova da translaziun.

Tut ils trics pon ins cumbinar cun grabs e repeter uschè ditg ch'ins è en l'aria.

Freeski

Rodeo
In cowboy sin skis, cun lasso e chapè... nana, atgnamain mo in backflip cun ina rotaziun orizontala d'almain 540°. Oriundamain vegn quel tric dals aissists.

Misty
Tge che tuna forsa in pau tschajerus n'è nagut auter ch'il cuntrari d'in rodeo. Pia in frontflip cun rotaziun.

Lincoln Loop
Anteriur president american Abraham Lincoln aveva da ses temp inventà quest tric cura ch'el è crudà da ses balcun... na, spass. Quest tric vegn dad Ed Lincoln, skiunz da freestyle e stunt dubel da James Bond en «Der Spion, der mich liebte». Ma uss il Lincoln Loop: Quai è in salto da la vart. Uschè simpel.

Snowboard

McTwist
Halfpipe. In McTwist è in frontflip cun rotaziun che vegn fatga cun il dies emprim. Vul dir sper il salto vegn fatg ina rotaziun orizontala durant la quala l'aissist na vesa l'entschatta betg en direcziun ch'el sgola. Cumplitgà? Quardai.

Chicken salad
Miamm, ma questa giada era insatge per vegis: Il Chicken salad è atgnamain «mo» in grab. Il bratsch davos tschiffa tras las chombas l'ur davos da l'aissa, tranter las liadiras da la vart dals chaltgogns. La chomba davant è stendida.
Ma emprova ina giada da far quel ensemen cun in flip...

Superman
In frontflip che vegn fatg l'entschatta plaun, uschia ch'ins vesa ora sco Superman senza mantelet. Avant sa tschentar vegni dentant cusseglià da finir tant pli spert il salto. Va era cun skis.


Ussa che vus avais legì quai essas pronts per il proxim artitgel: