Siglir tar il cuntegn
cuntegn

Maraton da skis 2018 Nauscha prognosa da l’aura per il maraton

Punctualmain sin il 50avel maraton da skis en l'Engiadina turna la naiv puspè. E sco sche quai na fiss betg avunda èsi sin la segunda part dal traject schizunt da quintar cun plievgia cunquai che las temperaturas èn fitg miaivlas – quai tenor SRF Meteo. Malgrà quai èn ils curriders da buna luna.

Tschiel blau, temperaturas fraidas e vent vers oragiu – quai fissan las cundiziuns optimalas per il 50avel maraton da skis engiadinais. Da tut quels trais facturs datti quest onn dentant sulet in: Il vent, quai di Gaudenz Flury dad SRF Meteo. Vitiers na datti dentant tschiel blau mabain nivels, naiv e plievgia.

Plievgia sin segunda part dal traject

I vegnia cun tranter 2 e 4 grads pulit miaivel e cunzunt sin la segunda part dal traject vers S-chanf èsi perquai plitost da quintar cun plievgia che cun naiv. Là nua ch'i dat naiv dettia quai dentant fin mezdi be 5 fin 10 centimeters uschia Gaudenz Flury. Fin la saira poi lura tut tenor dar fin 20 centimeters naiv nova. Ils responsabels per la pista speran ch'i na dettia betg massa blera naiv durant la notg sin dumengia. Quai muntass fitg blera lavur cunlas maschinas, senza pudair garantir ina loipa optimala.

Loipa plauna

Temperaturas miaivlas, naiv e plievgia: Tut quai fa vegnir plauna la loipa uschia il meteorolog dad SRF. Cun novs records na saja quai pervia da quai betg da quintar. Almain il vent è pulit ferm cun bufs fin a 50 kilometers l'ura e quel suffla vers oragiu tge che pudess anc gidar in zic ils curriders.

RR actualitad 17:00