Siglir tar il cuntegn

Header

Navigaziun

Purtret da dunnas sin skis da cursa lunga.
Legenda: La cursa da dunnas en Engiadina è stada il start en l'emna da maraton. Keystone
cuntegn

Maraton da skis 2017 La Svedaisa Maria Gräfnings gudogna la cursa da dunnas

Sis curridras han dominà la cursa da dunnas. Davant èn stadas Maria Gräfnings, Seraina Boner e Rahel Imoberdorf. Ellas han bainbaud pudì bajegiar or in avantatg sin la segunda gruppa da trais Flurina Eichholzer-Bott (Zernez), Heidi Widmer (Tavau) e Claudia Schmid (Lucerna).

Purtret da Seraina Boner da Tavau.
Legenda: La Svizra Seraina Boner è sa decidida a curta vista da sa participar a la cursa da dunnas. Keystone

Las trais curridras davant, Maria Gräfnings, Seraina Boner e Rahel Imoberdorf hajan gia suenter curt temp gì in avantatg passa 100m sin lur proximas trais concurrentas. Tar Zuoz haja lura Gräfnings dà avant in tal tempo che las duas Svizras n'han gì naginas schanzas pli da tegnair cun.

Las autezzas tranter Zuoz e l'arrivada n'hajan fatg nagina fadia a la Svedaisa tar si'emprima cursa da dunnas en Engiadina. Ella haja trenà la sonda ils ultims tschintg kilometers cun sia collega da team Rahel Imoberdorf. La finala haja ella gudagnà cun radund 25 secundas avantatg sin la segunda, Seraina Boner ch'era sa decidida a curta vista da far part a la cursa suenter ils campiunadis mundials.

En tut èn 980 participantas tranter 15 ed 80 onns sa participadas a la 18avla cursa da dunnas en Engiadina. Suenter las nevadas dals ultims dis saja grategià als organisaturs da preparar fitg bain la loipa sur notg. L'emna da maraton va vinavant mesemna cun la cursa da notg tranter Sils e Puntraschigna. Il venderdi van juniors e l'elita al sprint da notg a San Muretzan. La dumengia è lura il 49. maraton da skis Engiadinais sur ils 42 kilometers tranter Maloja e S-chanf.

RR novitads 12:00