Siglir tar il cuntegn

Sport regiunal Valposchiavo Calcio crai da pudair batter il favurit

Gia per la terza giada entaifer ils ultims tschintg onns è Valposchiavo Calcio en il final da la Cuppa Grischuna. Mintga giada encunter Schluein Glion. Ina giada han ils Sursilvans gudagnà, ina giada ils Puschlavins.

Valposchiavo Calcio
Legenda: Valposchiavo Calcio Emprima equipa MAD

Igl è gia bunamain tradiziun: Trais giadas entaifer ils ultims tschintg onns hai dà il medem final en la Cuppa Grischuna da ballape: Schluein Glion encunter Valposchiavo Calcio. Quai na saja betg ina mala bilantscha per in pitschen club sco Valposchiavo manegia Michele Bongulielmi. El è giugader da mez ma l’ultim temp ha el giugà pervia da mancanza da giugaders sco defensur.

Bilantscha uliva

L’emprim final tranter ils dus clubs aveva Schluein Glion gudagnà, l’ultim dentant Valposchiavo. La bilantscha è pia uliva. Gudagnar la Cuppa Grischuna è per Bongulielmi ina gronda finamira persunala, mo quai saja era ina gronda finamira dal club. Astgar giugar in final saja adina insatge fitg emoziunal.

En in sulet gieu è tut pussaivel

Schluein Glion che dat en la segunda liga saja disà da dar en in ritmus pli aut che Valposchiavo che gioga en la terza liga. Ma en in singul gieu saja tut pussaivel. Els vegnian en mintga cas a dar tut per pudair prender la trofea da la Cuppa Grischuna en il Puschlav empermetta Michele Bongulielmi.

RR actualitad 08:00