Adina il medem final ils ultims onns en la Cuppa Grischuna da ballape – ed adina las medemas victuras: Tusaun-Cazas ha battì Domat. Igl è il duel da las duas unicas equipas Grischunas da la segunda liga. Tusaun-Cazas è actualmain a la testa da quella e stat curt avant la promoziun en l’emprima liga. Perquai è Tusaun-Cazas era questa giada favurita en il final encunter Domat.
Encunter Domat vai adina piz a cup
La defensura da Tusaun-Cazas Ivana Netzer spera che lur seria da success cuntinueschi. Mo encunter Domat dettia quai adina gieus piz a cup. L’onn passà ha Domat pers il final pir en la lutga da penaltis. Ed era en il campiunadi ha Domat gia gudagnà il derby. Pervia d’ina terrada encunter Domat ha Tusaun-Cazas manchentà l’onn passà la promoziun.
Il bab sco emprim trenader
Ivana Netzer che vegn da Savognin di ch’ella saja creschida si cun il ballape. Sco pitschna haja ella adina giugà ballape cun ils mattatschs e da quels haja ella era emprendì bler. Ses bab saja stà ses emprim trenader en il CB Sursès. Perquai che mo paucas mattatschas dettian ballape en Sursès haja ella cumenzà a giugar cun Tusaun-Cazas. Là sa sentia ella era bain. Ellas hajan ina super equipa ed ina stupenta atmosfera.
RR actualitad 07:00