Siglir tar il cuntegn
cuntegn

Sport regiunal In trist gieu per l'US Schluein Glion

Atgnamain fissi ina festa da ballape, il final da la Cuppa Grischuna tranter l'US Schluein Glion e Valposchiavo Calcio d'Ascensiun a Cuira. Mo per ils giugaders da Schluein Glion èsi in trist di. Els han stuì prender cumià quels dis da lur congiugadur David Bystron.

L'Arena da ballape Crap Gries cun vista vers il vitg da Schluein.
Legenda: Ils giugaders da Schluein han dasper la tema d'ina relegaziun era da sbatter cun il destin. RTR

Ils giugaders da l’Uniun sportiva Schluein Glion han stuì prender cumià quels dis da lur congiugadur David Bystron. Igl anteriur profi da la Tschechia ch'ha schizunt giugà en la Champions League è mort il venderdis passà. Pervia da la trista nova han las equipas da Schluein Glion spustà ils gieus da campiunadi da l’ultima fin d’emna. Mo uss cuntinuescha la stagiun, e quai gist cun il final da la Cuppa Grischuna encunter Valposchiavo Calcio.

Chaschun da spendrar ina stagiun nuncuntentaivla

Il final d'Ascensiun encunter Valposchiavo Calcio saja ina chaschun da spendrar ina stagiun nuncuntentaivla dian il trenader assistent David Caduff ed il caposajettagols Gabriel Derungs. Schluein Glion vegn probabel strusch pli da mitschar da la relegaziun da la segunda en la terza liga. Gudagnar la Cuppa Grischuna fiss en quai senn ina pitschna consolaziun.

Adina gieus stretgs encunter Valposchiavo

Schluein Glion è in giast regular en il final da la Cuppa Grischuna. Duas giadas han ils Sursilvans era giugà encunter Valposchiavo Calcio. Ina giada ha Schluein Glion gudagnà, ina giada Valposchiavo. En sasez vess Schluein Glion che dat en la secunda liga dad esser pli ferms che Valposchiavo da la terza. Mo en ils gieus encunter Valposchiavo haja quai adina dà resultats stretgs dian ton David Caduff sco Gabriel Derungs.

RR actualitad 08:00