Siglir tar il cuntegn
cuntegn

Sport regiunal Domat vul finalmain gudagnar il final

Ils ultims onns èn las ballapedistas da Domat adina stadas en il final da la Cuppa Grischuna. Ed adina han ellas pers quel encunter Tusaun-Cazas. L’ultima giada mo piz a cup en la lutga da penaltis. Ussa fissi temp da gudagnar quel.

Las ballapedistas da Domat
Legenda: Las ballapedistas da Domat vulan finalmain gudagnar ina giada il final da la Cuppa Grischuna. MAD

L’onn passà èn las ballapedistas da Domat stadas uschè datiers sco anc mai da gudagnar la Cuppa Grischuna. Pir en la lutga da penaltis han ellas pers encunter lur rivals eterns da Tusaun-Cazas. Omaduas equipas dattan en la segunda liga. Ed en gieus da campiunadi ha Domat era gia gudagnà il derby encunter Tusaun-Cazas.

Tribunas plainas motiveschan

L’attatgadra Ladina Dermond sa legra che Domat ha in’ulteriura schanza en il final da la Cuppa Grischuna. Ella sa legra oravant tut d’astgar giugar avant ina tribuna plaina en il stadion a Cuira. Tribunas plainas sajan ina raritad en il ballape da dunnas, ma quellas tribunas plainas motiveschian.

Adina vulì giugar ballape, ma betg gì la chaschun

Ladina Dermond è creschida si a Rueun. Ella haja adina vulì giugar ballape, mo à Rueun haja ella strusch gì la chaschun. Avant trais onns saja ella vegnida ad abitar a Domat e dapi lura dettia ella en lur equipa da ballape. Cunquai ch’ella è la pli sperta giugadra da Domat dettia ella sco attatgadra ora sin l’ala. Là dovria quai giugadras spertas.

RR actualitad 07:00