Siglir tar il cuntegn

Campiunadis mundials «Trenar cundiziun è ina part dal gieu»

Oliver Riedwyl è quest um ch’è responsabel ch’ils giugaders svizzers sajan mintgamai fit per il gieu. Dapi bun quatter onns trenescha el cundiziun cun Xherdan Shaqiri, Ricardo Rodriguez e collegas.

Purtret dad Oliver Riedwyl.
Legenda: Oliver Riedwyl trenescha la cundiziun cun la naziunala svizra. Keystone

Oliver Riedwyl n’ha betg adina in simpel job, pertge trenar cundiziun n’è betg gest quai ch’ils giugaders fan il pli gugent. Mo quai saja simplamain ina part dal gieu, perquai emprovia el era adina da motivar l’equipa, uschia Riedwyl.

Trenaments individuals

Ils trenaments da cundiziun èn fitg individuals. Perquai sto Oliver Riedwyl er enconuscher bain ils giugaders. I na saja betg prudent e pussibel da trenar cun tuts tuttina. Perquai lavura Riedwyl er ensemen stretg cun ils trenaders da cundiziun dals differents clubs nua ch’ils Svizzers èn sut contract. La gronda sfida è da mirar che tuts sajan top fit al di x, al di da gieu, oravant tut tar in tal turnier nua ch’i dovra ina prestaziun extraordinaria da mintgin per la finala avair success.

Che Oliver Riedwyl fa buna lavur mussan ils resultats. Tant encunter la Brasilia sco era encunter la Serbia han ils Svizzers mussà ch’els èn fits e quai sur 90 minutas e dapli.

RR actualitad 07:00