Il podest
- 1. Victor Muffat-Jeandet (Frantscha) 2:35,29 minutas
- 2. Pavel Trikitschew (Russia) +0,96
- 3. Peter Fill (Italia) +1,15
Svizzers cun puncts
- 6. Mauro Caviezel +1,23
- 7. Justin Murisier +1,30
- 19. Nils Mani +3,13
Out
- Luca Aerni, Marc Gisin, Gilles Roulin, Stefan Rogentin, Gian Luca Barandun
Festa da skis a Wengen n’ha betg cumenzà optimal per ils svizzers
En la cumbinaziun è Mauro Caviezel vegnì 6avel (+ 1,23 sec.) ed è uschia stà il meglier skiunz da Swiss Ski. Gest davos Caviezel è Justin Murisier vegnì 7avel cun in retard dad 1,30 secundas sin il Franzos Victor Muffat-Jeandet che gudogna sia emprima cursa da la Cuppa mundiala.
Grazia al meglier temp en il slalom ha Victor Muffat-Jeandet pudì far il pass dal 27avel plaz enfin sisum il podest. La finala ha il Franzos gudagnà cun in avantatg da bunamain ina secunda sin il Russ Pavel Trikitschew. Terz è vegnì il Talian Peter Fill che gudogna uschia la culla da cristal da la cumbinaziun.
Ils Svizzers n’han betg pudì nizzegiar lur buna situaziun da partenza suenter la cursa rapida da l’avantmezdi. Sper Mauro Caviezel e Justin Murisier han sulet anc Nils Mani e Ralph Weber cuntanschì l’arrivada. Cun in retard da passa 3 secundas è Mani vegnì 21avel. Nagins puncts da la Cuppa mundiala n'hai percunter dà per Ralph Weber. Gist tschintg Svizzers èn dads ora en il slalom, tranter auter er il campiun mundial Luca Aerni ed il Grischun Gian Luca Barandun.
Cursas senza Carlo Janka
Pervia dad ina ferida dal schanugl na po Carlo Janka betg esser da la partida tar las cursas dal Lauberhorn a Wengen. Era senza Janka ch'ha festivà en Surselva Bernaisa numerus success, ha la Svizra dentant trumfs en satg. Surtut Beat Feuz ch'ha era gia fatg il pass sin il podest da la cumbinaziun a Wengen.
Mauro Caviezel igl meglier Svizzer fin da qua
Fin tar ils gieus olimpics datti mo duas cumbinaziuns alpinas. L'emprima è stada la fin da december a Bormio en l'Italia. Là ha Mauro Caviezel gia savurà vi dal podest. Caviezel è vegnì quart ed è uschia il meglier skiunz svizzer en questa disciplina.
RR actualitad 11:00+