Siglir tar il cuntegn

Campiunadis mundials Schurter e Neff siemian dal titel a chasa

Gia sis giadas è Nino Schurter vegnì campiun mundial da mountainbike, ma anc mai a chasa. Quai vul il campiun olimpic midar il settember a Lai.

Nino Schurter e Jolanda Neff.
Legenda: Nino Schurter e Jolanda Neff. Keystone

Vegnir campiun mundial, quai è nagut da nov per Nino Schurter. Gia sis giadas è il mountainbiker lumnezian vegnì campiun mundial da l'elita, ulteriuras sis giadas tar il juniors, ils U23 u cun la staffetta svizra. Ma a chasa en Svizra è il campiun olimpic da Rio anc mai vegnì campiun mundial. Quai vul Nino Schurter midar ils 8 da settember a Lai cura ch’el parta sco defensur dal titel al campiunadi mundial da mountainbike. L’atun passà ha Schurter gudagnà a Cairns en l’Australia ses sisavel titel da campiun mundial tar l’elita, quai è record.

Era Jolanda Neff parta sco defensura dal titel

Quai che Nino Schurter è tar ils umens è Jolanda Neff tar las dunnas: la meglra ciclista da mountainbike da la Svizra e – almain il mument - la meglra dal mund. Suenter che Neff aveva gia gudagnà duas giadas la cuppa mundiala da mountainbike è ella vegnida l’atun passà a Cairns per l'emprima giada campiunessa mundiala. Quai titel vul Jolanda Neff defender il settember als campiunadis mundials a Lai. I fiss l’emprima victoria impurtanta a Lai. La cuppa mundiala sin la medema pista da cursa ha ella numnadamain anc mai gudagnà.

Corina Gantenbein, la ciclista grischuna atipica

Corina Gantenbein è la suletta grischuna che è en l'equipa naziunala svizra da mountainbike. Ella è ina ciclista atipica che ha cumenzà pir sco persuna creschida cun il sport da mountainbike. Sco giuvna era ella insumma betg sportiva e sunava pli gugent violina. Ma malgrà ch’ella ha atgnamain cumenzà memia tard ha ella tuttina anc fatg ina bella carriera. Cun 28 onns è la sportista da Claustra vegnida per l’emprima giada en l’equipa naziunala. Uss ha Corina Gantenbein 32 onns ed anc adina betg a fin da ses svilup sportiv. Als campiunadis mundials a Lai vul ella meglierar sia otgavla plazza dal campiunadi mundial da l’onn passà.

RR sportissimo 17:00