Siglir tar il cuntegn
Inhalt

Campiunadis mundials Na be a San Murezzan vegn cumbattì per medaglias

Parallel cun ils skiunzs a San Murezzan cumbattan era ils biatlets per medaglias, quai als campiunadis mundials da biatlon a Hochfilzen en l’Austria. A la partenza è era in quartet rumantsch: Las trais soras Aita, Elisa e Selina Gasparin e Serafin Wiestner.

Selina Gasparin durant il trenament a Lai.
Legenda: Selina Gasparin durant il trenament a Lai. Keystone

Selina Gasparin parta cun bunas regurdientschas a Hochfilzen. Là, en la vischinanza da Kitzbühel, ha ella gudagnà avant bun trais onns sia emprima cursa da la cuppa mundiala. La vice-campiunessa olimpica da Sochi è lura era il grond trumf da las Svizras – quai malgrà ch’ella ha cuntanschì en questa stagiun pir in plaz en las meglras diesch.

Sco gia diversas giadas è la staffetta da las dunnas puspè ina chaussa da famiglia. Las trais soras Gasparin partan ensemen cun Lena Häcki.

Serafin Wiestner vul copiar la stagiun passada

Er Serafin Wiestner trenescha actualmain a Lai.
Legenda: Er Serafin Wiestner trenescha actualmain a Lai. Keystone

Esser en furma durant il punct culminant da la stagiun. Quai è grategià a Serafin Wiestner la stagiun passada. Curt avant ils campiunadis mundials aveva Wiestner realisà ses meglier resultat, ina tschintgavla plazza. Curt suenter era Wiestner stà cun ina 11avla plazza als campiunadis mundials ad Oslo il meglier svizzer.

Ses siemi a Hochfilzen è da far anc in pign pass enavant e vegnir en ils top diesch. Bunas schanzas e forsa schizunt schanzas da medaglias haja la Svizra en la staffetta maschadada cun duas dunnas e dus umens.