Siglir tar il cuntegn

Header

cuntegn

Snowboard alpin a Scuol Per Ricarda Hauser datti la premiera a chasa

La giuvna snowboadista Ricarda Hauser da Scuol po festivar sia premiera en la cuppa mundiala da snowboard alpin tar las cursas da chasa.

Avant passa 10 onns ha tut cumenzà sin la muntogna sur Scuol. La matta Ricarda Hauser ha cumenzà ad ir cun il snowboard, en la regiun da Motta Naluns. Davent da l’entschatta era quai sia gronda passiun. Entant è Ricarda Hauser creschida e sportista da professiun. Ella parta en emprima lingia en la Cuppa d’Europa a las cursas da snowboard, ella ha er gia fatg part a campiunadis mundials da junioras. Uss spetga il proxim pass. Ricarda Hauser po partir per l’emprima giada ad ina cursa da la cuppa mundiala. E quai lura gist anc tar ella a chasa a Scuol.

Bunas prestaziuns e bun svilup durant ils davos mais

Tar il davos campiunadi mundial da junioras a Krasnoyarsk en Russia ha Ricarda Hauser manchentà sco quarta be per pauc ina medaglia. Durant ils mais da stad ha ella pudì far la scola da recruta per sportistas da professiun. Gia quai è stà per la giuvna sportista in'enorma experientscha. Durant mais ha ella pudì sa concentrar be sin trenament, regeneraziun e sport. Cun quel bun sentiment ha ella cumenzà la nova stagiun nua ch'ella è vegnida duas giadas terza en la cuppa d’Europa. Tut criteris ch'han purtà ad ella la nominaziun per las cursas da la cuppa mundiala a Scuol.

audio
Ricarda Hauser e sia premiera a Scuol
ord Actualitad dals 07.01.2022.
laschar ir. Durada: 3 minutas 2 Secundas.

Sez il pli grond squitsch

La famiglia, dentant era amias ed amis vegnan a sustegnair Ricarda Hauser tar sia premiera. Per la sportista n'è quai betg in squitsch supplementar. Il pli grond squitsch fa ella a sasezza. La finamira è simplamain dad ir bain cun il snowboard ed alura da mirar tge che quai porta.

RTR actualitad 17:00

Artitgels legids il pli savens