Siglir tar il cuntegn

Header

cuntegn

Ski alpin Sandro Simonet sin buna via suenter blessura

A la fin da la stagiun passada as s'è il skiunz Sandro Simonet ferì vi dal schanugl. El ha stgarpà ils lioms cruschads. Suenter l’operaziun da primavaira e la fasa da guariziun, è el uss sin buna via.

La stagiun da skis passada è stada ina stagiun disgraziada per il grischun Sandro Simonet. Il skiunz da Castì n'è mai propi vegni sin turas. Ina 21-avla plazza tar il slalom da Schladming è stà il meglier resultat da l’entira stagiun. La gronda part dals slaloms da la stagiun passada n'ha Sandro Simonet savì terminar, ni ch'el n'era gnanca qualifitgà per la segunda cursa. La ferida tar il slalom da Flachau a la fin da la stagiun e uschia in zichel sintomatica per l’entira stagiun.  

audio
Sandro Simonet è suenter sia ferida sin buna via
ord Actualitad dals 19.11.2022. Maletg: Keystone
laschar ir. Durada: 2 minutas 27 Secundas.

Ferida a Flachau, operaziun e reabilitaziun

En il slalom da Flachau en Austria è Sandro Simonet sgulà e s’ha stgarpà ils lioms cruschads. Be in per dis suenter è il grischun vegni operà. Alura e segui il lung temp da reabilitaziun. Dapi la stad è Simonet dentant puspè vi dal trenament da basa. Tut la guariziun ed il trenament fin uss e grategià bain. Perquai che el ha dentant pudì cumenzar pir pli tard cun il trenament da la stad è el cuntent che la stagiun dals slaloms cumenza quest on in pau pli tard. A Levi en Finlanda èn mo las dunnas a la partenza, ils umens seguan lura la mesadad da december cun il slalom da Val d’Isère. Alura vegn quai dentant intensiv. Quasi mintga fin d’emna spetga in classicher. Ed in favrer da l’onn proxim spetga anc il champiunadi mundial a Courchevel e Méribel en Frantscha.

Artitgels legids il pli savens