La tiradura Nina Christen è la victura olimpica en sajettar cun la buis sur 50 meters, en trais differentas posiziuns. La dunna da 27 onns è sa messa tras encunter las duas Russas, Julia Sykowa e Julia Karimowa. Cun questa victoria è ella l'emprima tiradura svizra che gudogna aur olimpic. L'ultim aur olimpic en trais posiziuns, dentant sur 300 meters, aveva gudagnà Emil Grüning il 1948 a Londra per la Svizra.
En il final han las tiraduras gì da dar giu tschintg sajets en pe. Là ha Christen mussà gnervas d'atschal ed ha tutgà tut ils tschintg sajets cun sur 10,0. La finala ha ella gì dus entirs puncts avantatg.
Avant gnanc in'emna aveva Christen gia gudagnà bronz sur ils 10 meters cun la buis ad aria cumprimida e cun quai l'emprima da fin ussa 10 medaglias svizras.
Avant tschintg onns als gieus olimpics da Rio era ella vegnida 6avla en il match da trais posiziuns.