Siglir tar il cuntegn

Header

cuntegn

Regiunal USSI sto prender cumià da la 2. liga

Uss èsi definitiv – l’US Schluein Glion na vegn betg pli da mitschar da la relegaziun e sto far il pass enavos en la 3. liga da ballape. L’equipa sursilvana ha pers la mesemna saira a chasa encunter Widnau cun 1:3 ed uschia stuì magunar la 14avla terrada en questa stagiun.

En la 80avla minuta dal gieu encunter Widnau è la davosa speranza morta da restar en la 2. liga. Diesch minutas avant la fin dal gieu ha Widnau tuc al 3:1 ed uschia dà il davos stausch als da Schluein direcziun 3. liga.

Cumenzà aveva il gieu bain per l’equipa da chasa. En la 36avla minuta ha Dario Derungs manà ils Sursilvans cun 1:0 en avantatg. Be ina minuta pli tard dentant la resposta da Widnau al 1:1. Schluein Glion n’ha dentant betg dà si e cumbattì vinavant. Mo enstagl da sajettar il 2:1 ha l'USSI cassà dus ulteriurs gols suenter pausa.

L’US Schluein Glion ha duas rundas avant la fin dal campiunadi 9 puncts retard sin il stritg. Cunquai èsi cler ch’ils Sursilvans suondan l’equipa da Bogn Ragaz en terza liga. Ils davos dus gieus da campiunadi dat Schluein Glion a chasa encunter Mels (3-6-2017) ed ordaifer encunter Altstätten (10-6-2017).

Dal 2013 – 2017 en 2. liga

L’US Schluein Glion ha giugà durant quatter stagiuns en la 2. liga da ballape, ha dentant stagiun per stagiun stuì cumbatter vehementamain cunter la relegaziun. Ils davos trais onns è l’equipa Sursilvana mintgamai mitschada piz a cup. En questa stagiun n’hai dentant betg pli tanschì. Oravant tut la runda d’atun è stada miserabla. Dals emprims otg gieus da campiunadi han ils da Schluein gudagnà sulet in gieu.

En terza liga vala l’US Schluein Glion franc sco ina da las equipas favuritas. Tenor David Caduff, il trenader assistent, na vegni betg a dar grondas midadas en l’equipa, anzi, intgins giugaders da la segunda equipa vegnan a far il pass en l’emprima equipa uschia che Schluein Glion pudess esser anc pli ferm l’onn proxim. La finamira dal trenader Cyrille Belinga è da returnar tant pli spert en 2. liga.

RR actualitad 08:00

Artitgels legids il pli savens