Siglir tar il cuntegn

Header

foto d'equipa US Schluein Glion
Legenda: L’equipa da Schluein Glion cumbatta era quest onn cunter la relegaziun en terza liga. MAD
cuntegn

Regiunal US Schluein Glion – co vinavant?

Ils davos onns èn stads intensivs per la USSI e quai ha laschà enavos fastizs. I dettia in tschert malruaus, din commembers dal club. Las opiniuns davart la strategia e l'avegnir van per part fermamain in ord l'auter.

Ils ins vulan exnum tegnair l’equipa da la US Schluein Glion en la segunda liga. Quai era cun rinforzar l’equipa cun giugaders esters. Ils auters vulan giugar cun ils giugaders indigens.

Per chattar in consens ed ina strategia che tuts pon sustegnair, datti la sonda ina radunanza extraordinaria.

Dar cun ils giugaders indigens

Per Beat Dermont èsi cler, co la strategia duai vesair ora. El vul laschar giugar ils giugaders indigens. Tegnair l’equipa en la segunda liga cun giugaders esters, quai n’è tenor el betg la dretga via. La US Schluein Glion saja da principi in’equipa ed in club da terza liga.

Purtret Beat Dermont
Legenda: Beat Dermont vesess gugent puspè pli blers giugaders indigens sin il plaz. MAD
Tenor miu manegiar ei l'US Schluein Glion in'uniun cun structuras per la tiarza ligia.
Autur: Beat Dermontcommember e speaker USSI

Cumbatter per restar en segunda liga

Tut auter vesa quai il president Simon Lutz. El vul far tut il pussibel per che l’equipa possia restar en segunda liga. Quai saja impurtant per il club. En terza liga na vegniss tenor el betg pli simpel. Per exempel fiss la tschertga da sponsurs lura anc pli greva.

Simon Lutz
Legenda: Il president Simon Lutz vegn a terminar ses uffizi tar la US Schluein Glion l'onn che vegn. RTR
Mia finamira ei che nus sesin ensemen e vein puspei ambiziuns.
Autur: Simon Lutzpresident US Schluein Glion

Communicaziun difficila

Per il giugader Gabriel Derungs èsi il pli impurtant, ch’ils giugaders pondereschan tge ch’els vulan. Sch’els èn pronts d’investir il temp necessari per dar en la segunda liga, da trenar bler. Mo era da chattar la dretga colla per tegnair ensemen en l’equipa, era sper il plaz. La communicaziun saja fitg impurtanta. Cun ils giugaders esters na saja quai pervi dal linguatg betg adina simpel da communitgar e da sa chapir.

Gabriel Derungs vida festivar in gol.
Legenda: Gabriel Derungs e ses congiugaders cumbattan cunter la relegaziun. MAD
En princip essan nus schon in club che viva dils giugadurs indigens.
Autur: Gabriel Derungsgiugader

Radunanza cun impurtantas discussiuns e decisiun

La radunanza extraordinaria è sonda a las 17:00. Per ina vul ins chattar ensemen ina via, ina strategia communabla per il futur dal club. Per l’autra vegn anc tschertgà in successur per il president Simon Lutz, che ha communitgà gia questa stad da chalar l'onn 2017. Era per l'actuar Marco Schmid vegn tschertgà in/a successur/a.