Siglir tar il cuntegn

Regiunal Tut pront per la Alpen Challenge 2016

Radund milli ciclists van er quest onn a la partenza a la Alpen Challenge, il maraton da velo en il Grischun. Quest onn datti in novum, la cursa cumenza a Lai enstagl a Lantsch.

Ciclists vers il Pass da l'Alvra.
Legenda: Gruppa vers il Pass da l'Alvra. Keystone

Sco gia ils davos onns datti er a la 17avla ediziun da l’Alpen Challenge duas cursas, la curta cun ina distanza da 119,1 kilometers e 2’718 meters differenza d’autezza e la cursa roiala sur 193,6 kilometers cun 4’235 meters differenza d’autezza. Ils participants derivan da l’entira Europa. Ciclists grischuns hai be paucs a la partenza. Quai haja dentant er ina raschun di il schef dal comité d’organisaziun, Flurin Bezzola da Zernez. En il Grischun domineschia il sport da mountainbike e betg quel da velo da cursa.

Flurin Bezzola, Zernez
Legenda: Flurin Bezzola, schef dal comité d'organisaziun Alpen Challenge. RTR, Andreas Wieland

Dapli service

Cun far la partenza a Lai datti er intgins kilometers dapli. Persuenter datti quest onn er dapli service. Ils posts d’alimentaziun èn vegnids engrondids ed optimads. Sin la cursa roiala datti da nov tschintg enstagl da trais posts d’alimentaziun.

Plinavant datti quest onn er in transport da bagascha.

I spetga in di magnific

L’aura constat, quai empermettan almain ils meteorologs. La culissa è spectaculara. Ils ciclists pon pia spetgar in di magnific cun ir cun velo sur divers pass grischuns. Il maraton da velo Alpen Challenge vala dapi onns sco ina da las pli bellas e spectaculara cursas da velo en l’Europa.

Cursa curta: Alvra e Güglia

La cursa curta sur 119,1 kilometers e 2’718 meters differenza d’autezza maina da Lai vers Alvagni sur il pass da l’Alvra en l’Engiadin’Ota. Sur il pass dal Güglia turnan ils ciclists enavos en il Grischun Central fin l’arrivada a Lantsch.

Cursa lunga: Alvra, Malögia e Spleia

La cursa lunga sur 193,6 kilometers e 4’235 meters differenza d'autezza maina sco la cursa curta da Lai ad Alvagni sur il pass da l’Alvra en l’Engiadin’Ota. Vinavant vai lura sur il pass dal Malögia fin a Chiavenna. Da 325 meters sur mar vai sin il pass dal Spleia (2’113 msm) via Tusaun fin a Lantsch.

Partenza da la cursa Alpen Challenge è la dumengia, ils 14 d’avust 2016 a las 07:00 uras. Ils emprims da la cursa curta vegnan spetgadas en l’arrivada curt avant las 11:00 uras, ils emprims da la cursa roiala tranter las 13:00 e las 13:30 uras.