Siglir tar il cuntegn
Inhalt

Regiunal Trofea Péz Ault: Organisaturs satisfatgs, malgrà aura d'enviern

Radund 150 curriduras e curridurs han fatg la dumengia la cursa da skis da tura Trofea Péz Ault. Malgrà aura propi d'enviern èn ils organisaturs pli che satisfatgs da l'ediziun 2018 da la cursa.

Per la 9avla giada ha Mustér organisà la cursa cun skis da turas, la Trofea Péz Aut. Radund 150 participantas e participants èn ids la dumengia la bun'ura baud a la partenza a Caischavedra.

La ruta Verclisa per ils ambiziunads...

Ils ins èn currids la ruta Verclisa, la cursa roiala sur var 14,18 kilometers lunghezza e 1'658 meters ascensiun. Caischavedra sur la Muotta al pe dal Péz Ault sin 2929 meters sur mar. Ella traversa la grippa dal Péz Gendusas e suenter suonda l’ultima ascensiun dal couloir surora.

... e quella Gendusas per quels in zic main ambiziunads

Ils auters han prendì la ruta in zic pli pacifica ed han sa participà a la cursa Gendusas sur 8,1 kilometers lunghezza e 734 meters ascensiun. L’emprima etappa cumenza plitost lev, suenter datti ina passascha in pau pli taissa fin sin la Muotta. La ruta bain segirada ha manà per lung da la grippa fin a Lai Alv per alura ascender il couloir.

La partenza a la cursa:

Felicia Deflorin e sia cursa

La dunna da Mustèr è ina da las curriduras indigenas, ch'ha prendì la lunga ruta sut ils skis:

Ils organisaturs èn pli che cuntents

En discurs cun il reporter da sport Andreas Wieland da Radiotelevisiun Sviizra Rumantscha RTR è il president dal comité d’organisaziun, Leo Condrau, sa mussà suenter la cursa pli che cuntent cun l'ediziun 2018:

Cursa en Surselva è er campiunadi ollandais da skis da turas

Sco gia l'onn passà era la Trofea Péz Aul er quest onn al medem mument il campiunadi naziunal ollandais da skis da tura. Uschia eran er 50 ollandais a la partenza:

Per il giubileum da 10 onns han ils organisaturs planisà ina cuppa mundiala. Quella è dals 22 als 24 da mars 2019. Organisada vegn ella dals responsabels per la Trofea Péz Ault e dal Club alpin svizzer.

Ina cuppa mundiala sco punct culminant da la 10avla ediziun

Sco Leo Condrau di, vegnian curridurs da l’entir mund a prender part da la concurrenza. Els quintian cun 80 fin 100 participants e ca. 200 aspectaturs. La cuppa mundiala vegn fatga en 2 variantas. Ils profis absolvan la varianta verticala, vul dir els van mo cun las pels da Caischavedra ensi fin Lai alv. Quai saja ca. 800 meters differenza d’autezza. L’autra cursa è la Trofea Péz Ault usitada.

Per els saja la cuppa mundiala cun skis da turas il punct culminant dal giubileum da 10 onns Trofea Péz Ault, di Leo Condrau.

RR Sportissimo 17:05+