Siglir tar il cuntegn

Regiunal Triumf spagnol al Swissalpine 2017

Il Spagnol Tofol Castanyer è il nov retg dal Swissalpine, l’ultramaraton alpin a Tavau. Castanyer ha gudagnà la cursa roiala K78 en in temp da bun sis uras e 25 minutas.

Il currider da Mallorca ch’è sa participà l’emprima giada al Swissalpine è uschia stà bunamain otg minutas pli spert ch’il segund, il Svizzer Roman Wyss. Terz è vegnì l’American Matt Flaherty.

Legende: Video Swissalpine 2017 abspielen. Laufzeit 03:34 Minuten.
Or da RTR dals 30.07.2017.

Terrada grischuna tar las dunnas

Tar las dunnas ha gudagnà suveran Ida Nilsson. La Svedaisa ha duvrà per ils 78 kilometers da Tavau a Bravuogn sur il pass Sertig ed enavos a Tavau bun set uras e tschintg minutas. Ida Nilsson è uschia la successura da Jasmin Nunige da Tavau. La mattadura locala e favurita ha stuì terminar la cursa a Bravuogn pervi d’ina blessura vid in pè. Nunige ha gia gudagnà set giadas sia cursa roiala da chasa.

Tut en tut èn bunamain 500 curridras e curriders sa participads al K78, pia sur la distanza lunga dal Swissalpine a Tavau.

Bunamain 35 uras per 214 km

Il Talian Peter Kienzl ha gudagnà la cursa roiala dal Swiss Irontrail T214. Kienzl ha duvrà per ils 214 kilometers da Tavau ver l'Engiadina enavos sur Surses puspè a Tavau bunamain 35 uras. La partenza per questa cursa extrema è stada il venderdi endamaun a las 04:00. Kienzl ha sco emprim cuntaschì l'arrivada la sonda suentermezdi curt avant las 15:00.

RR novitads 15:00