Cun in temp da 3 uras e 27 minutas ha l'Uranais Remo Betschart gudagnà la cursa. El è stà bun 2 minutas pli spert ch'il victur da l'onn passà il Turitgais Raphael Sprenger. Terz cun in retard da bun trais minutas è Gregor Metzger da Wil vegnì. In dals gronds favurits, il matador local Daniel Bolt d’Aschera/Schiers ch'aveva gudagnà avant in onn la cumbinaziun dal Transruinaulta e Transviamala ed uschia daventà il retg da las chavorgias, ha stuì sa cuntentar cun il quart plaz. Quai suenter ch’el ha patì pulit sin ils davos kilometers.
La pli sperta dunna cun temp da record
Michela Segalada da Winterthur è stada la pli sperta dunna. Ella è currida da Glion a Tusaun tras la Ruinaulta en temp da record da 3 uras e 46 minutas. Anc mai è ina dunna stada uschè sperta tras la chavorgia. Segalada è stà varga 20 minutas pli sperta che Edith Kortekaas che abitescha a Versomi. Terza cun in retard da bun mes’ura è daventada Katharina Hartmuth da Turitg. Betg a la partenza è Ornella Poltéra da Domat stada. Ella che aveva triumfà avant in onn al Transruinaulta.
Sco la giuvna da Winterthur Michela Segalada ha ditg haja ella insumma nagina rutina da cursas da maraton. Ella vegnia dal mountainbike e saja currida per l'emprima giada quella distanza.
Emprima etappa
Remo Betschart sco era Michela Segalada vegnan aunc a sa participar damaun a la Transviamala. En cas ch'els èn era damaun a la testa sche fissan els dus il nov retg e la nova regina da las chavorgias.
RR novitads 17:00