Siglir tar il cuntegn

Header

cuntegn

Transruinaulta 2021 Urs Jenzer gudogna tar sia premiera

Urs Jenzer da Frutigen en il chantun Berna e la Finlandaisa Susanna Huttunen ch’abitescha dentant en la Norvegia han triumfà al maraton da trail Transruinaulta da Glion a Tusaun. Omadus èn stads per l’emprima giada a la partenza.

audio
Urs Jenzer da Frutigen triumfescha al Transruinaulta
ord RTR Audio dals 23.10.2021.
laschar ir. Durada: 1 minuta 53 Secundas.

Susanna Huttunen è sa decidida spontan da sa participar al Transruinaulta perquai ch’ella frequenta il mument gist sias vacanzas d’atun en il Grischun. Per ils 42 kilometers cun 1'800 meters differenza d’autezza da Glion a Tusaun ha la Scandinava duvrà 4:08.42 uras. Ella è stada gnanc duas minutas pli sperta che Katja Zwiker dal chantun Turitg. Cumplettà il podest sco terza ha Martina Baumann.

Ina buna prestaziun han er mussà las duas rumantschas sursilvanas, Lena Kropf da Rabius e Monika Bearth da Sedrun. Kropf, cun 21 onns la pli giuvna a la partenza, è vegnida 17avla en in temp da 4:47.52 uras e Bearth ha terminà la cursa sco 20avla en 4:54.46 uras.

Katja Zwiker, Hannes Pongruber, Urs Jenzer, Susanna Huttunen, Matthias Schmidig, Martina Baumann
Legenda: Ils victurs dal Transruinaulta 2021: da san. Katja Zwiker (2.), Hannes Pongruber (2.), Urs Jenzer (1.), Susanna Huttunen (1.), Matthias Schmidig (3.) e Martina Baumann (3.) mad

Grischun enstagl La Palma

Urs Jenzer aveva planisà da currer ina cursa da trail sin l’insla La Palma. Pervia da l’activitad vulcanica è questa cursa però vegnida spustada uschia ch’il Bernais ha chattà ina bun’alternativa cun sa participar per l’emprima giada al Transruinaulta, e quai cun success. Il sportist da 51 onns ch’ha gia triumfà diversas giadas al Eiger Ultra Trail sur 101 kilometers è er stà il pli svelt al Transruinaulta 2021. Jenzer è currì il maraton da Glion a Tusaun en 3:24.37 uras ed è uschia stà bunamain 10 minutas pli spert che Hannes Pongruber da Hohenems en l’Austria. Cumplettà il podest sco terz ha Matthias Schmidig dal chantun Sviz.

Urs Jenzer
Legenda: Urs Jenzer a la testa dil Transruinaulta da Glion a Tusaun (42 km) mad

Ina buna prestaziun ha er il Lumnezian Sebastian Solèr mussà. Tar sia segunda participaziun al Transruinaulta è il Sursilvan vegnì 38avel en in temp da 4:25.05 uras. Er cuntanschì l’arrivada a Tusaun sut 5 uras ha tranter auter Flavio Monn da Sedrun ch’è gia currì per la 5avla giada la cursa da trail Transruinaulta.

audio
Lena Kropf è currida il Transruinaulta ensemen cun ses ami
ord RTR Audio dals 23.10.2021. Maletg: RTR, Andreas Wieland
laschar ir. Durada: 2 minutas 14 Secundas.
audio
Sebastian Solèr: «Igl è dir ed ins sto parter en bain las forzas»
ord RTR Audio dals 23.10.2021. Maletg: RTR, Andreas Wieland
laschar ir. Durada: 2 minutas 30 Secundas.
audio
Flavio Monn – per la 5avla giada al Transruinaulta
ord RTR Audio dals 23.10.2021.
laschar ir. Durada: 2 minutas 21 Secundas.

Tut en tut en stads a la partenza radund 500 curridras e curriders. La dumengia stat sin il program il Transviamala sur 19 kilometers da Tusaun a Donat en la Val Schons. Er per questa cursa è il dumber limità sin 500 curridras e curriders, quai pervia da la pandemia.

RTR actualitad 17:00

Artitgels legids il pli savens