La penultima stagiun era la meglra en la carriera da Thomas Tumler. Il skiunz da Samignun ha persvas cun duas plazzas tranter ils megliers 15 ed ina giada perfin cun ina otgavla plazza. Cun quels buns resultats vuleva Thomas Tumler ir en la stagiun 2016/2017 cun il punct culminant: ils campiunadis mundials il favrer a San Murezzan. Or da quel siemi n'è dentant vegnì nagut. Pervi da problems cun il dies ha Thomas Tumler stuì terminar la stagiun gia il december.
Jau hai il sentiment da puspè pudair vegnir sin il nivel da quella giada.
Thomas Tumler è da buna speranza da puspè vegnir sin il nivel da ses meglier enviern. Quai era pervia ch'i dat nov material. La FIS, la federaziun internaziunala da skis, è turnada tar il radius dals skis sin la marca da 30 meters. Las davosas stagiuns era il radius anc tar 35 meters. Da nov èsi uschia pussibel da far stortas anc pli stretgas.
Jau persunal ma sent fitg bain sin ils novs skis. Jau n’hai betg pli problems cun il dies.
Il nov material fa gust sin la nova stagiun. Pervi dal radius dals skis ch'è vegnì pli pitschen che pli baud avessan ils skiunzs dad avair main problems cun il dies. Tar bain inqual skiunz era quai in dals gronds problems dals davos onns.
RR actualitad 07:00