Siglir tar il cuntegn

Header

audio
Las damas da Trun èn da nov en la liga naziunala C da las 30+
Or da Actualitad dals 21.06.2022. Maletg: RTR
laschar ir. Durada: 4 minutas 10 Secundas.
cuntegn

Tennis 30+ Trun va si en liga naziunala C

Sco avant 12 onns, lura anc sco activas, dumognan las giugadras da tennis da Trun la promoziun en la liga naziunala C. Quella giada en la categoria da 30+. La fasa da gruppa han ellas terminà sin l'emprim plaz. En las rundas da promoziun han ellas laschà nagina schanza a las adversarias.

La Surselva ha puspè in'equipa da tennis en liga naziunala C. L'equipa da dunnas 30+ da Trun ha dumagnà la promoziun, e quai a moda suverana. Per 5 da las 6 giugadras èsi ina sort déjà-vu. Anno 2010 eran ellas er idas si en la liga naziunala C. Lura anc sco activas e per la supraisa da blers, er dad ellas sezzas. L'aventura da lezza giada ch'ha cumenzà il matg 2011 en questa liga, è ida a fin suenter l'emprim onn per las Sursilvanas.

audio
Las damas da Trun èn da nov en la liga naziunala C da las 30+
ord Actualitad dals 21.06.2022. Maletg: RTR
laschar ir. Durada: 4 minutas 10 Secundas.

Suletta equipa grischuna 30+ en la naziunala C

Eran ellas sco activas avant 12 onns l'emprima equipa da tennis da la Surselva en la liga naziunala C, èn ellas uss la suletta equipa grischuna da la categoria 30+ en la liga naziunala C. Las pli fermas Grischunas en quella classa da vegliadetgna èn las damas da Panaduz, che dattan en liga naziunala A. Las damas da Trun ch'han gudagnà tut ils gieus en las rundas da promoziun encunter Zezras e Lucerna èn: Carla Flury-Nay (chapitania), Carmen Bearth-Albin, Sereina Decurtins, Simona Demont, Silvana Guldimann-Giger e Paula Nay. En la liga naziunala C da la categoria 30+ duessi esser pussaivel da tegnair pitg a las concurrentas. Betg l'ultim suenter la dominanza ch'ellas han mussà quest onn en emprima liga.

6 giuvnas cun magiels che fan viva
Legenda: In viva sin la promoziun MAd

Anc betg sa decididas

Sche las sis giugadras da tennis vegnan er propi a dar l'auter onn en la liga naziunala C da las 30+ ston ellas pir anc decider. Ambiziuns da giugar en quella liga pli auta han tuttas, di la chapitania Carla Flury. Cunquai che betg tuttas abitan en la regiun, pliras han dentant er famiglia, dependi uss er in pau nua che lur adversarias en quella naziunala C èn dachasa. Viadis memia lungs per la Svizra enturn na vulan ellas betg far. Er sche dar tennis è lur gronda passiun ed ellas fan quai ensemen gia passa 15 onns, i saja e restia in hobi.

RTR actualitad 17:00

Artitgels legids il pli savens