Dario Cologna è gia stà pliras giadas sin il podest a Tavau. L’onn passà ha el persvadì cun il terz plaz en la cursa da 15 kilometers. Per ina victoria a chasa n’hai dentant anc mai tanschì. Uss suonda la proxima schanza. Cologna resta dentant precaut. El n’haja anc betg chattà la meglra furma questa stagiun, er perquai ch’el saja stà in zic malsaun avant las davosas cursas da la cuppa mundiala a Ruka en Finlanda.
Cursas da chasa sut l’ensaina da corona
A Tavau spetgan en mintga cas cursas fitg spezialas. Per ina vegn cumbattì la sonda en il sprint e la dumengia en las cursas da distanza avant tribunas vidas. Er a l’ur da la loipa na vegni a dar nagins fans, quai ina da las mesiras pervia da la crisa da corona. Plinavant mancan tut ils passlunghists da la Norvegia, da la Svezia e da la Finlanda. Pervia da la situaziun critica da corona n’han ils Scandinavs betg fatg il viadi a Tavau.