Siglir tar il cuntegn
cuntegn

Sport regiunal Talent sursilvan da ballape mida en l’Austria

In dils pli gronds talents dal ballape Grischun cuntinuescha sia carriera en l'Austria. Igl attatgader Rafael Deplazes emprova da realisar tar Altach ses siemi da daventar profi.

Suenter dus onns tar Balzers en l’emprima liga fa Rafael Deplazes il proxim pass en sia carriera. L’attatgader da 19 onns banduna il Liechtenstein e mida tar Altach en il Vorarlberg. Là èsi previs ch’el dettia cun la segunda equipa. Quella dat en la terzauta divisiun da l’Austria. Tut segund survegn el lura era la pussaivladad da fufragnar, trenar u schizunt dar cun l’emprima equipa che dat en la Bundesliga, la pli auta divisiun da l’Austria. Altach è in fenomen en il ballape austriac. Malgrà ch'il lieu en la vallada dal Rain ha mo 6'500 abitants è il club sin il quart plaz da la tabella, anc avant clubs da renum sco il campiun da record Rapid Vienna.

Ses mentur e trenader Mario Frick

Balzers en il Principadi dal Liechtenstein. Là ha Rafael Deplazes che vegn da Disla giugà ils ultims dus onns tar il club local da l'emprima liga. Igl attatgader talentà ha gì là in trenader ch'è sezs stà in grond attatgader: Mario Frick, giugader naziunal da record dal Liechtenstein e durant blers onns legiunari en l'Italia. Da Mario Frick e da sia gronda experientscha ha Rafael Deplazes pudì profitar fitg.

Ina carriera da ballape ch’ha cumenzà en in vitget alpin

Rafael Deplazes e creschì en il vitget da Disla, ina fracziun da Mustér. Disla schai sin 1070 meters sur mar ed ha mo bun 100 abitants. Quai n’è betg gist in lieu predestinà per ina carriera da ballape. Mo grazia al sustegn da ses geniturs haja el pudì realisar ses giavisch da far carriera da ballape. L’emprima staziun èn ils juniors da Sedrun/Mustér stai. Lura ha el dà cun las diversas selecziuns regiunalas, grischunas, da la Svizra orientala e dal Liechtenstein. Sper il ballape ha Rafael Deplazes anc absolvì la scola da talents a Glion ed ha fatg in emprendissadi sco vendider da sport. Suenter dus onns a Balzers fa el ussa cun il transfer ad Altach in ulteriur pass en sia carriera.

RR Sportissimo 17:00