Siglir tar il cuntegn

Header

cuntegn

Swiss Epic Victoria svizra er tar la segunda etappa

Tschintg etappas, 330 kilometers e 11’000 meters differenza d’autezza. Quai è la cursa da mountainbike Swiss Epic. La cursa è gia per la quarta giada en il Grischun. Questa giada ha il Swiss Epic cumenzà a San Murezzan. La fin è alura a Tavau.

Il duo Svizzer Lukas Flückiger / Nicola Rohrbach gudogna era la segunda etappa dal Swiss Epic ch'ha menà sur 60 km da San Murezzan sur il Bernina a Val Poschiavo. En la cursa da mountainbike da pliras etappas han Flückiger/Rohrbach uss in avantatg da bunamain duas minutas.

Il Sursilvan Andrin Beeli cun Matthias Stirnemann terminescha la segunda etappa dal Swiss Epic sin il 12avel plaz. L'Engiadinais Fadri Barandun vegn ensemen cun Vinzent Dorn da la Germania 15avel.

Ils favurits a la testa gia tar l'emprima etappa

L’emprima etappa a San Murezzan cun il passagi sin il Lej Alv sur Marguns sin ina autezza da varga 2’500 meters sur mar è stada la partenza da questa aventura. E gia davent dal principi èn ils favurits stads davant vart da la partida. Lukas Flückiger e Nicola Rohrbach han alura era mussà sin ils 62 kilometers da l’emprima etappa pertge ch’els valian sco favurits. Il duo svizzer aveva laschà mitschar il duo talian Samuele Porro e Fabian Rabensteiner. La fin finala ha ils svizzers dentant giu las meglras chommas e pudì gudagnar l’emprima etappa.

Per Fadri Barandun da Samedan è il Swiss Epic da quest onn ina cursa da chasa. Gest las emprimas trais etappas passan tras la regiun ch’el enconuscha sa chapescha sco l’atgna giaglioffa. En Engiadina Auta trenescha il ciclist da 23 onns, qua sun sias ragischs. Per el è igl perquai anc in zichel pli spezial da participar al Swiss Epic. Cun la sisavla plazza suenter l’emprima etappa è el cuntents.

audio
Fadri Barandun davart emprima etappa dal Swiss Epic
ord Actualitad dals 17.08.2021.
laschar ir. Durada: 2 minutas 35 Secundas.

Andrin Beeli cun defect

Gia sin l’emprima etappa dal Swiss Epic ha Andrin Beeli da Sagogn stuì cumbatter cun in plat. El ha perfin stuì trair èn in uder en in dals pneus, quai che ha custà ina massa temps. A la fin è Andrin Beeli arrivà cun ses partenari Matthias Stirnemann sin plazza 9 cun in retard da quasi dudesch minutas.

audio
Andrin Beeli ha gi in defect
ord Actualitad dals 17.08.2021.
laschar ir. Durada: 25 Secundas.

 

RTR actualitad 17:00

Artitgels legids il pli savens