Il ciclist Matteo Badilatti da Poschiavo aveva gia fatg las emprimas cursas da l’onn 2020. Il favrer è el stà per cursas en Columbia ed en Tirchia. Lura è dentant vegnì il lockdown ch'ha franà er las ciclistas ed ils ciclists. Circa tschintg mais han quels stuì spetgar sin la cuntinuaziun da la stagiun da ciclissem. Cun il classicher da Milano a San Remo turna questa fin d’emna puspè in zichel normalitad en la scena da ciclissem.
Segunda part dal cumenzament
Suenter las emprimas cursas l'entschatta da l’onn ed il stop pervia da corona, ha uss cumenzà la nova stagiun. Quella spetga cun classichers da primavaira ch'i dat pir l’atun e cun ina u l’autra cursa gronda sco il Tour de France, il Giro d’Italia ed er la Vuelta d’España ch'èn vegnids spustads sin ils proxims mais.
Cuntent da puspè ir cun il velo
Matteo Badilatti da Poschiavo fiss er quest onn stà nominà per il Tour de Suisse. Pervia dal coronavirus n'èsi dentant stà nagut cun quest siemi. Perquai emprova il ciclist grischun da mussar uss anc durant il rest da la stagiun bunas prestaziuns e da sa profilar uschia per ina nominaziun l’onn che vegn.