Al campiunadi svizzer da passlung a Steg en il Principadi da Liechtenstein han passlunghistas e passlunghists engiadinais mussà stupentas prestaziuns. Tar l’ultima concurrenza gronda da quest enviern han els gudagnà quasi en tut las disciplinas.
Aur en las categorias da juniors
Tar las junioras sut 18 onns ha Anja Lozza da Zuoz gudagnà la cursa da 15 kilometers en il stil liber. Quai avant Nadja Kälin da Samedan. Maurus Lozza, il frar grond dad Anja, ha gudagnà la cursa dals juniors sut 20 onns da 30 kilometers. E Giuliana Werro da Zernez ha terminà la cursa da las dunnas sur 15 kilometers sut 20 onns sin il segund plaz.
Aur era en la staffetta
In success cumplain engiadinais ha quai er dà tar la staffetta. Las passlunghistas dal club da skiunzs Sarsura Zernez, Fabiana Wieser, Jogscha Abderhalden e Giuliana Werro èn las novas champiunessas svizras.