Bain pussaivel ch'i dat in enviern senza tensiun e fevra da cumbat e sa mesirar per tschients d'uffants. Saja quai cun skis, passlung, snowboard, etc. Il conclus dal Cussegl federal en temp da corona scumonda tuttas cursas d'uffants e giuvenils fin 16 onns.
In enviern senza cursas na vul nagin - nus duvrain in plan B
En Surselva han ils responsabels tar l'SST decidì da trenar vinavant sco sch'i dess ina stagiun normala da cursas. Nagin sa, co l'entira pandemia da corona sa sviluppescha e quant ditg che il «ad interim» che Berna ha decidì vegn a cuzzar e sche e cura ch'i dat eventual in nov conclus che lubescha singulas cursas. Tenor Remo Veraguth, il schef alpin tar il Team da sport Surselva SST, stuess cun concepts da segirtad rigurus ed eventualmain separar (in di buobs e l'auter las mattatschas) ina u l'autra cursa esser realisabla.
Sch'i dat propi in enviern senza Mini-Cup, JO-Cup, BSV-Cup, cursas naziunalas ed interregiunalas U16, sa tschenta era la dumonda, co selecziunar per in cader pli aut, sch'ils resultats sin palpiri mancan. E na emblidar la motivaziun dals giuvenils che treneschan dir. Quels vulan sa mesirar e mussar prestaziun e lavuran vid lur siemi da forsa pudair far lur sport a moda professiunala.
Davos las culissas ed ensemen cun la Federaziun grischuna da skis vegn en mintga cas rotà pulit per cuntanscher in'eventuala midada dal conclus. Sa chapescha adina era cun la sanadad en mira e che quella na vegn betg periclitada en il temp da Covid-19.
