Schluein Glion e Domat: 2 equipas - 1 finamira

En il campiunadi da la 2. liga èn las squadras da Schluein Glion e Domat concurrents. Insatge han ellas dentant communabel: omaduas squadras giogan encunter la relegaziun.

giugadurs che dattan ballape

Legenda da maletgs: US Schluein Glion gioga cunter la relegaziun cunter Domat. RTR, U. Lechmann

Ch’ils Sursilvans èn en questa situaziun na fa betg surstar. Schluein Glion dat pir la segunda stagiun en la 2. liga ed han l'onn passà stuì cumbatter enfin l'ultim gieu cunter la relegaziun. Che la squadra da Domat è sut il stritg suenter la mesadad dals gieus, quai fa surstar. La stagiun passada ha Domat anc cuntanschì il segund rang, uss è l’equipa da Walter Frizzoni sut il stritg.

Schluein Glion: meglier che l’onn passà

L’equipa da Schluein Glion po ir cun in meglier sentiment che avant 1 onn en la runda da primavaira. Ils Sursilvans èn cun 12 puncts sin plaz 9 ed han 3 puncts avantatg sin in rang da relegaziun.

«  Nus luvrein cun in fetg bien cader e vulein restar en la segunda liga. »

Urs Casutt
Trenader Schluein Glion

Era cun la preparaziun è il trenader Urs Casutt cuntents. Ins haja sco usità trenà fisicamein. Mo els hajan era nizzegià il temps per integrar ils giugaders ch’eran vegni vitiers da nov la stad.

Domat: Grondas midadas en il cader

Suenter las mediocras prestaziuns dal atun han ins reagì a Domat, il cader è sa midà bravamain. 10 giugaders han bandunà l’equipa, 8 novs èn vegni vitiers. Tenor il trenader Walter Frizzoni sentian ins gia in effect en l’equipa. Ils giugaders sajan puspè pli ambizius.

«  Jau sai ord experientscha che quai vegn ad esser fin la fin ina dira chaussa. »

Walter Frizzoni
Trenader Domat

Omaduas equipas cumenzan la runda da primavaira la sonda da Pasca. Schluein Glion dat a chasa cunter St. Margrethen e Domat dat ordaifer cunter Diepoldsau-Schmitter.