Siglir tar il cuntegn

Header

cuntegn

Regiunal Schluein Glion cun cader decimà

Suenter tschintg rundas giugadas en la segunda liga regiunala è l’emprima equipa da la US Schluein Glion sin plaz diesch. Sulet trais puncts ha l’equipa sursilvana recaltgà fin ussa. Il motiv principal è la lunga glista d’absenzas.

En tut ils gieus da la stagiun actuala èn ils da Schluein Glion ids cun ina lunga glista d’absenzas. Il punct culminant è stà il gieu cunter Ruggell dals 10 da settember. Betg main che 12 giugaders han mancà, ils blers pervi da blessuras. Tranter els fitg blers giugaders da tschep. Il trenader ha en tut ils gieus stuì midar fermamain l’equipa. Per exempel ha l'attatgader Gabriel Derungs giugà pliras giadas sco defensur.

Ils problems èn fin ussa surtut stads en l’offensiva. Schluein ha sajettà sulet trais gols en tschintg gieus da campiunadi. Persuenter ha la defensiva prestà buna lavur, quella ha incassà sulettamain otg gols fin ussa, quai èn pli paucs che per exempel Montlingen ch’è sin plazza dus.

schef da sport Urs Casutt
Legenda: Il schef da sport Urs Casutt mussa la direcziun, ensi: Pudair ord il tschaler da la tabella è dentant actualmain grev, pervia da blers giugaders blessads. MAD

Nagins novs giugaders

Rinforz a curta vista per remplazzar ils blessads na vegni tenor il schef da sport Urs Casutt betg a dar. Il cader saja avunda lad ed ins vegnia da remplazzar ils giugaders. Fin la pausa d’enviern spera Casutt da pudair recaltgar set fin otg puncts ord dals sis gieus restants. Sin la primavaira sajan lura ils blers giugaders enavos en l’equipa, e lura vegnian els era a far avunda puncts per sa distatgar dal tschaler da la tabella, è Casutt persvadì.

Il proxim gieu da campiunadi dat la US Schluein Glion sonda saira a las 17:00 ordaifer cunter il capo gruppa Au-Berneck.

Artitgels legids il pli savens