La «Saslong» – la pista da skis en Val Gardena n'è betg la pista preferida da Sandro Viletta. Gia duas giadas ha la pista bittà giu il skiunz da La Punt. L'emprima giada il december 2015 nua che Viletta s'ha ferì in schanugl. Ina segunda giada in onn pli tard nua che Viletta s'ha stgarpà ils bindels en crusch.
Jau hai manchentà quasi las davosas trais stagiuns da skis.
Dapi il titel da campiun olimpic l'onn 2014 n'ha Sandro Viletta mai propi pudì far mussar sia classa. Feridas han adina puspè franà il skiunz da 31 onns. Cun in trenader privat emprova Viletta uss da puspè vegnir fit e da puspè pudair turnar en la cuppa mundiala da skis. A Zinal en il chantun Valais cumbatta Viletta per ses «comeback».
Jau na sun betg anc là nua che jau vuless esser.
Era sche Sandro Viletta n'ha ditg betg pli participà a cursas da la cuppa mundiala è il skiunz anc adina motivà da far vinavant. El va simplamain gugent cun skis. Uschè ditg che quai è uschia vul il skiunz cuntinuar. Per il mument gartegian ad el parts dad ina cursa fitg bain. Uss vali da metter ensemen il entir puzzle e lura sperar ch'el saja spert.
RR sportissimo 17:00