Siglir tar il cuntegn

Header

Navigaziun

cuntegn

Regiunal Sandra Schmidt – ina vita per il hockey

La gronda passiun da Sandra Schmidt è il sport da hockey. Per il mument dat la giuvna da 15 onns en tschintg differents caders hockey.

La famiglia da Jachen Andri e da Gaby Schmidt da Sent è ina famiglia da purs. Sur Sent cultivescha la famiglia in bain puril da 35 hectaras. La famiglia è dentant era ina famiglia da hockey. Ils trais uffants, Linard, Dario ed era la giuvna Sandra dattan a hockey. Ils fragliuns Linard e Dario tar il Cdh Engiadina, la sora Sandra en tschintg differentas equipas.

Dal Cdh Engiadina fin tar l’equipa naziunala sut 16 onns

La passiun da Sandra Schmidt per il hockey ha cumenzà ensemen sun ses frars. Linard e Dario che èn quatter, respectiv tschintg onn pli vegls che Sandra han mussà a la sora il sport cun patins e bastun. Sandra Schmidt che ha 15 onns dat actualmain per l’equipa da las dunnas dal Cdh Engiadina en liga naziunala C, lura era per l’equipa da las dunnas da Kreuzlingen en liga naziunala B e Sandra Schmidt è era part da l’equipa naziunala sut 16 onns.

Emprim grond turnier en Tschechia

Da curt ha Sandra Schmidt participà al campiunadi europeic cun la naziunala svizra sut 16 onns. A Pribram en il sid da Prag ha l’equipa naziunala cuntanschì l'otgavla plazza. Il campiunadi europeic era pir il terz turnier da quest gener. Suenter las emprimas experientschas tar in grond turnier vul la giuvna giugadra da hockey cuntinuar sin questa via. Fin da qua vegn ella da cumbinar fitg bain sia passiun per il sport da hockey, la scola ed auters interess. Il fatg ch'ella dat dentant en tschintg differentas equipas pretenda blera flexibilitad.

15’000 kilometers sin via per il sport

Actualmain passenta Sandra Schmidt era bler temp en il auto. Ensemen cun ses bab, Jachen Andri Schmidt, fa ella radund 15’000 kilometers en il auto. Per il bab sa chapeschia dentant da sai che el e sia dunna sustegnan lur uffants en il sport da hockey. E per ch'ils figls Linard e Dario na vegnan betg a la curta fa il bab tranteren era chauffeur per els.

RR sportissimo 17:00