Siglir tar il cuntegn

Header

cuntegn

Sajettar cun pistola Elmar Fallet tutga puspè en il nair

Dapi onns è Elmar Fallet da Müstair in dals megliers tiradurs grischuns e naziunals. Il pur cun la gronda passiun da trair pistola ha gia gudagnà diversas concurrenzas. Ses pli grond success è senza dubi il titel da campiun svizzer l’onn 2017.

Dacurt ha ina giuria ed il public tschernì Carl Frischknecht da Tumegl sco tiradur grischun da l’onn 2021. Nominà per questa distincziun eran er Norbert Caviezel, il retg da tir cun schluppet ed il jauer Elmar Fallet. Fallet ha gudagnà questa distincziun gia quatter giadas. Il pur da Müstair tutga dapi onns tar l’elita dal sport da tir grischuna e naziunala. E quai malgrà ch’el n'investescha gnanc uschè bler temp en ses sport.

audio
Elmar Fallet ha cumenzà bain la stagiun da tir
aus Actualitad vom 13.05.2022.
abspielen. Laufzeit 3 minutas 4 Sekunden.
Sch'jau vom ad in tir hai jau schon la finamira da mussar buns resultats u da gudagnar. Betg main impurtant è dentant il plaschair.
Autur: Elmar Fallet pur e tiradur

Il meglier è Elmar Fallet en il stan da tir

Be trais u quatter tregants da pistola èn activs en Val Müstair. Uschia èsi grev da propi tegnair aut il livel. Il meglier è Fallet sch’el vegn senza grond squitsch en il stan da tir e sajetta ses program. Gia diversas giadas è el vegnì dubel campiun grischun sin las distanzas da 50 u 25 meters pistola. Tar la davosa Festa da tir federala l’onn passà a Lucerna è el vegnì segund en il final dals megliers otg.

Finamira: Cuppa da matsch cun final a Müstair

Durant l’emna investescha Elmar Fallet magari pauc en il trenament: Fin uss ha el sajettà be circa 500 tuns da trenament. La fin d’emna lura sa partecipescha il tiradur a las differentas concurrenzas. Duas da quellas da la nova stagiun ha el gia gudagnà. La finamira principala da questa stagiun è la cuppa da matsch, che vegn sajettada durant l’entira stad. Il final è lura durant la pausa da chatscha ils 17 da settember en Val Müstair.

RTR actualitad 07:00

Artitgels legids il pli savens

Scrollar a sanestra Scrollar a dretga