Fadri Barandun ha gudagnà la cursa da velo da Panaduz via Glion fin a Val. L'Engiadinais ha laschà davos el Thomas Häusermann da Winterthur (+0,59 min) e Pascal Nay dal Club da velo Cuira (+1,09 min). Tar las dunnas è Nina Zoller da Cuira stada la pli sperta. L'anteriura campiunessa mundiala dal duatlon ha battì la Tudestga Daniela Höfer per passa trais minutas. Cumplettà il podest sco terza ha Alessia Nay, er ella dal Club da Velo Cuira.
Rangaziun 2021
Cursa speziala pervia da corona
Il temp è quest onn però vegnì mesirar sin quatter segments, mintgamai las passaschas ensi. Sin ils tschancuns a Val sco per exempel da Versomi a Glion è il temp mintgamai vegnì neutralisà. Plinavant hai dà ina partenza singula. Mintga minuta è vegnì tramess sin viadi in ciclist, quai tut per tegnair en las prescripziuns da corona sco la distanza.
Tut en tut eran s'annunziads passa 170 persunas per la cursa. La finala èn radund 70 ciclistas e ciclists ids a la partenza a Panaduz. Franà bain inqualin ha er l'aura. Igl è stà fraid ed in ferm vent ha tratg. Tar l'arrivada a Val hai schizunt gì intgins centimeters naiv.
Als organisaturs èsi stà impurtant da porscher puspè ina cursa da velo, quai dentant cun sa tegnair vid tut las prescripziuns da segirtad ch’i dat pervia da corona. Avant dus onns aveva quest classicher da velo stuì vegnir
stritgà pervia da l'aura, avant in onn aveva la pandemia franà la cursa.