Siglir tar il cuntegn

Header

cuntegn

Rheinquelle-Trail Nina Zoller – la gronda victura 2022

La sportista da Cuira ha gudagnà per la terza giada en roda la cursa da trail a Sedrun. Ella è stada ina classa per sa sezza ed ha schizunt battì tut ils umens.

Terza cursa dal Rheinquelle-Trail – terza victoria per Nina Zoller ch’abitescha a Mustér. La sportista da 35 onns ha triumfà a la cursa sur 42,2 kilometers cun passa 3'000 meters differenza d’autezza en 5:44.49 uras. Tar las dunnas è Zoller stada bunamain in’ura e ventg minutas pli sperta che la segunda Astrid Forrer dal chantun Son Gagl. Terza è vegnida la Lucernaisa Marion Steiner-Friedrich.

Arno Baselgia da Lantsch sin il podest tar ils umens

Tar ils umens ha Johannes Schnitzer da Hospental en il chantun Uri gudagnà la cursa roiala sur la distanza da maraton, quai en 5:53.19 uras. El è stà bun trais minutas pli spert che Simon Leu dal chantun Lucerna. Cumplettà il podest sco terz ha Arno Baselgia da Lantsch. El ha pers bun 11 minutas sin il victur dals umens.

Nina Zoller, Johannes Schnitzer
Legenda: Nina Zoller e Johannes Schnitzer – ils dus victurs a Sedrun. mad

Wenk gudogna per ina giada la cursa curta

La cursa curta sur bun 18 kilometers ha gudagnà tar ils umens Stephan Wenk dal chantun Turitg. Avant in onn aveva Wenk gudagnà la cursa roiala ed avant paucs dis vegnì 7avel al campiunadi d’Europa da trailrunning a La Palma. Tar las dunnas è Bernadette Betschart dal chantun Uri stada la pli sperta sur la distanza curta.

Cursa perfetga – paucs participants

Tut en tut en radund 150 curridras e curriders stads a la partenza dal terz Rheinquelle-Trail a Sedrun en la Val Tujetsch. Malgrà ch’i saja stà ina grondiusa cursa e tut che haja constà avessan els spetgà dapli participants, bilantschescha Simona Barmettler, maina-fatschenta da Mustér Sedrun Turissem. Per l’emprima giada hajan els er pudì organisar in cursa da trail per uffants cun in percurs d’obstachels sin l’areal da la partenza e l’arrivada.

Trailrunning
Legenda: Impressiun dal Rheinquelle-Trail 2022. mad

Ord l'archiv:

Nina Zoller è ferma en il duatlon ed ha l'antschà il 2020 ina buna stagiun. La sportista da Cuira ha er gia survegnì premis per sias prestaziuns.

audio
Nina Zoller – duathlon
ord Sportissimo dals 16.05.2020. Maletg: MAD
laschar ir. Durada: 4 minutas 28 Secundas.

Novitads 12:00

Artitgels legids il pli savens