Siglir tar il cuntegn

Header

audio
Davide Beer (24) da Rabius avant sia partenza al «Rheinquelle Trail»
Or da Actualitad dals 09.07.2020.
laschar ir. Durada: 3 minutas 58 Secundas.
cuntegn

«Rheinquelle Trail» Davide Beer: «Jau hai schon in zic starment»

Passa 500 curridras e curriders èn s’annunziads per la premiera da las cursas dal Rheinquelle Trail da sonda, ils 11-07-2020. Passa 300 participants van a la partenza dal «Tomasee-Trail», la cursa roiala sur la distanza da 41,1 kilometers e 3’182 meters differenza d’autezza.

Tranter ils participants tutga er Davide Beer da Rabius. Il giuven da 24 onns vul dumagnar la distanza lunga che maina l’emprim da Sedrun siadora sin il Tgom. Suenter ina descensiun da bun 1’000 meters vai lura puspè ensi sur il Piz Cavradi vinavant sur il Piz Nurschalas (Pazolastock), l’aut punct da la cursa cun 2’740 meters sur mar. Ils davos bun 15 kilometers mainan a val fin a Sedrun.

Jau vegn a patir extrem, ma la finala decida mo pli il chau.
Autur: Davide Beer 24 onns, Rabius

Respect ha Davide Beer oravant tut da currer engiu, là n’haja el betg gronda experientscha. El na saja er betg sa preparà pli spezial sin questa cursa extrema, ma el possia morder sin ils dents, quai saja sia fermezza, uschia il giuven sursilvan.

profil Tomasee-Trail
Legenda: Profil «Tomasee-Trail» - la cursa lunga. mad

«Tgom-Trail» - la cursa curta

Bunamain 200 persunas van a la partenza dal «Tgom-Trail», la cursa curta sur ina distanza da 16,2 kilometers cun 1’225 meters differenza d’autezza. Er questa cursa maina l’emprim siadora sin il Tgom e turna silsuenter puspè enavos a Sedrun.

Partenza per ils curriders sur la distanza lunga è la sonda a bun'ura a las 08:00 uras. A las 09:00 uras vegnan ils curriders da la cursa curta tramess sin viadi.

Rutas Rheinquelle Trail
Legenda: Rutas da las duas cursas, «Tomasee-Trail» e «Tgom-Trail». mad

RTR Actualitad 17:00

Artitgels legids il pli savens