Prerunda da la Cuppa svizra - Schluein Glion è en il final - Sport

Prerunda da la Cuppa svizra Schluein Glion è en il final

Autur: RTR online

L'US Schluein Glion ha cuntanschì il final da la prerunda da la Cuppa svizra. Ils Sursilvans, che dattan en terza liga, han battì en il mezfinal Pfyn, il club da quarta liga da la Turgovia, cun 2:0. Ils gols han Lars Caduff (4. minuta) e Laurin Zala (71. minuta) sajettà. En il final spetga uss il il club songagliais, il FC Besa. Medemamain in club che dat en terza liga. Gudogna Schluein Glion quest final (26 da matg) è il club da la Foppa en la runda principala da la Cuppa Svizra. Là poi vegnir ad in duel encunter in grond dal ballape svizzer. Tut tenor encunter in club da la Super League, tge che fiss sa chapescha insatge grond per la pli ferma equipa da ballape sursilvana. Proxim focus da l'US Schluein Glion è dentant la runda da primavaira dal campiunadi en terza liga. Quella ha cumenzà la fin d'emna dals 7 d'avrigl, gist cun il derby encunter ils rivals eterns da Trun/Rabius. Schluein Glion ha gudagnà cun 7:0.