Siglir tar il cuntegn
Inhalt

Sport regiunal Preparativas turbulentas per la «Alpen Challenge» Lai

Ina cursa da velo sur ils pass da l’Alvra e dal Güglia e l’autra sur l’Alvra, il Malögia ed il Spleia, quai è la «Alpen Challenge» cun partenza ed arrivada a Lantsch.

Las preparativas èn stadas turbulentas. Curt avant Nadal han las autoritads talianas annunzià ch’els na lubeschian betg ina cursa sur il Spleia durant il termin ch’era fixà gia daditg sin ils 13 d’avust 2017. Ils organisaturs han uschia stuì tschertgar in nov termin, han stuì contractar cun auters organisaturs e cun las destinaziuns e la hotellaria. Tut è grategià ed uss è la «Alpen Challenge» cun da quai da 1’300 ciclistas e ciclists dumengia, ils 6 d’avust.

L’arena da biatlon sco center ciclistic

Nov è quest onn che la partenza e l’arrivada è en l’arena da biatlon a Lantsch. Avant era quai entamez il vitg da Lantsch. Per Flurin Bezzola, il president dal comité d’organisaziun, porscha l’arena da biatlon divers avantatgs logistics. L’entira infrastructura ch’els dovrian saja gia avant maun. Plinavant hajan ils responsabels da l’arena da biatlon gronda experientscha en l’organisaziun d’eveniments sportivs. In exempel sajan las etappas dal Tour de ski en il medem lieu.

RR Sportissimo 17:00