Piranha Cuira sin via al quart titel en seria

Piranha Cuira ha gudagnà ils davos 5 onns gist 4 titels da campiun svizzer. Il club grischun dad unihockey da las dunnas è dapi intgins onns sin in’unda da success, e quella para dad avair nagina fin.

Equipa dad unihokcey da las dunnas Piranha Cuira.

Legenda da maletgs: Piranha Cuira dominescha dapi intgins onns il sport dad unihockey da las dunnas en Svizra Keystone

Piranha ha er gudagnà en questa stagiun la qualificaziun e parta uss en ils playoffs sco il favurit.

Gudagnà 19 da 21 gieus en qualificaziun

Piranha Cuira ha gudagnà 19 da 21 gieus en la qualificaziun e terminà quella dus puncts avant il grond rival, l’UHC Dietlikon. Ussa cumenza dentant tut tar nulla. En la seria da mezfinal, ina seria da best of five, cumbatta Piranha Cuira encunter l’equipa bernaisa da Burgdorf, in’equipa che las giugadras grischunas han battì tuttas trais giadas en la qualificaziun.

Il siemi da giugar il “superfinal”

La finamira è clera tar Piranha Cuira, numnadamain da pudair giugar il superfinal ed uschia avair la schanza da danovamain defender il titel. Il superfinal è in novum en il sport dad unihockey en Svizra. Per l’emprima giada insumma vegn il cumbat per il titel da campiun svizzer decidì en in sulet gieu, quai avant plirs millis aspectaturs en il stadion da hockey a Kloten. Enfin ussa vegniva adina giugà ina seria da best of five u best of seven. Quest final, tant tar ils umens sco er tar las dunnas, è ils 18 d’avrigl 2015.