Il culp da partenza è crudà pli baud che spetgà. La Federaziun svizra da tiradurs aveva declerà ch'i na dettia nagins trenaments ed occurrenzas fin la fin da matg. Il Cussegl federal lubescha entant dapi mez matg da puspè ir en ils stans da tir. Tge che legra d'ina vart la famiglia da tir. Da l'autra vart vegn l'euforia dad ir a sajettar franada pulitamain, cunquai che las prescripziuns en chaussa protecziun en temp da corona èn rigurusas sin e dasper ils stans da tir. Hubert Tomaschett, il vicepresident da la Federaziun Grischuna dal Sport da Tir è en stretg contact cun las societads da tir. Il regl da puspè ir a sajettar saja grond tar mintga tiradur. Ma numerus fetschian part da la gruppa da ristga – hajan 65 onns u dapli – e pervi da las prescripziuns e las circumstanzas dadas, desistian uschia blers.
Cun tut las prescripziuns da distanza, igiena e da persunalias n'è igl ir a sajettar betg tuttina sco avant la crisa da corona. Surtut era il star da cumpagnia, l'amicabel, ch'ha gronda muntada en il ravugl dals tiradurs, vegn a la curta. La gronda lavur da la Federaziun Grischuna è stada las ultimas emnas d'infurmar e surtut spustar u annullar occurrenzas da tir.
Tirs cun reuniuns pli grondas èn scadin cas illusoricas en questa stagiun, che n'è uschia betg propi ina. Ma ina speranza resta, il final dal campiunadi grischun da tir, viaden en l'avust.
