Siglir tar il cuntegn

Header

cuntegn

Passlung Livio Matossi sa prepara sulet sin nova stagiun

La primavaira è Livio Matossi da San Murezzan vegni bittà or dal cader C da Swiss Ski. Uss sa prepara il passlunghist sulet sin la nova stagiun. Suenter dischillusiun è el da buna speranza en vista a la proxima stagiun.

Il schoc era grond la primavaira cura che la federaziun svizra da skis, Swiss Ski, ha bittà Livio Matossi da San Murezzan or dal cader C. Senza preavis han ils trenaders da Swiss Ski decis da betg pli resguardar il sportist engiadinais. Malgrà che Livio Matossi ha mussà prestaziuns vaira passablas durant la davosa stagiun n'era quai betg avunda per ses trenaders. Era la premiera en la cuppa mundiala al Tavau Nordic n'era in argument betg ferm avunda per salvar Livio Matossi en il cader C.

Suenter dischillusiun da buna speranza

Che Livio Matossi n'è betg vegnì resguardà pli era per el l’emprim mument in schoc. Suenter l’emprima dischillusiun ha il giuven sportist dentant decidì da far enavant. L’emprim ha Matossi fatg la scola da recrut per sportists da professiun. Là ha el gì l’infrastructura perfetga da trenament. Alura avess el gì la pussaivladad da trenar ensemen cun atletas ed atlets dal BSV, la federaziun da skis grischuna. Pervia d'ina malchapientscha è Matossi dentant era crudà or da quest cader. Uss trenescha el ensemen cun ses bab, Reto e la sora Ursina.

Finamira da turnar puspè en in cader da Swiss Ski

Cun bunas prestaziuns durant il proxim enviern vul el sa recumandar puspè per la federaziun svizra da skis. Quai è la finamira da Livio Matossi. El vul puspè sa participar a las cursas da la cuppa svizra. Alura er a cursas da la cuppa continentala. Sche las prestaziuns èn bunas, pudessi esser ch'el vegn puspè nominà per la cursa da la cuppa mundiala, Tavau Nordic, il mez da december.

RR sportissimo 17:00