Siglir tar il cuntegn

Header

audio
Livio Bieler terminescha sia carriera
Or da Actualitad dals 12.03.2021.
laschar ir. Durada: 3 minutas 28 Secundas.
cuntegn

Passlung Livio Bieler: «Igl è temp per dir adia»

La carriera da Livio Bieler sco passlunghist professiunal va a fin. Cun 27 onns è l’atlet da Panaduz sa decidì da trair in stritg, quai suenter blers auts e bass.

Igl è stà in grondius viadi per mai, in viadi da speranza e siemis, da victorias e terradas.
Autur: Livio Bieler passlunghist

Livio Bieler parta questa fin d'emna en l’Engiadina a sias davosas cursas da la cuppa mundiala. Silsuenter spetgan anc ils campiunadis svizzers a Sedrun. Lura è quest chapitel a fin.

audio
Livio Bieler davart success e puncts culminants
ord Actualitad dals 13.03.2021.
laschar ir. Durada: 3 minutas 31 Secundas.

I manca la motivaziun e l’energia

I saja stà onns nunemblidaivels sco profi da passlung. Il sport da prestaziun haja dà bler dapli che mo buns resultats, uschia Livio Bieler che n'ha betg gì simpel il davos onn. La primavaira 2020 er el vegnì bittà ord il cader da Swiss-Ski.

Il davos onn ha el anc ina gia fatg tut il pussaivel per chattar la via enavos al success. Tranter auter è Bieler er stà la stad passada en la Norvegia a trenar, quai sulet e sin agen custs. Tut quels sforzs n’han dentant betg purtà il resultat giavischà. Er la crisa da corona n'haja betg fatg pli simpel l’entira situaziun.

Mes siemis e giavischs n’èn betg ids tuts en vigur, ma jau sun adina stà vidlonder cun corp ed olma.
Autur: Livio Bieler 27 onns da Panaduz

Prendì la decisiun da terminar la carriera ha Livio Bieler a l’ur da las cursas da la cuppa mundiala da Tavau Nordic mez december, là nua ch’el aveva dà il 2014 ses debut en la cuppa mundiala.

Livio BIeler
Legenda: NORDIC FOKUS

Success plitost a cursas naziunalas

Livio Bieler, che vala sco spezialist en il stil classic, è stà classà duas giadas sut ils top 30 en ina cursa singula da la cuppa mundiala. En il skiatlon sur 30 kilometers il favrer 2017 a Pyeongchang avevi schizunt tanschì per il 14avel plaz. Il punct culminant saja dentant stà d’astgar currer la staffetta ensemen cun Dario Cologna, Toni Livers e Roman Furger il december 2018 a Beitostolen en la Norvegia. Bieler era currì ils emprims 10 kilometers en il stil classic e silsuenter surdà a Cologna. La finala era la staffetta svizra vegnida quarta en questa cursa.

Astgar far ina cursa da staffetta da la cuppa mundiala ensemen cun Dario Cologna, quai è propi stà cool.
Autur: Livio Bieler 8 x campiun svizzer

A campiunadis svizzers ha Livio Bieler gudagnà 23 medaglias, 8 dad aur.
Dals 26-28 da mars 2021 sa participescha Bieler per la davosa giada a campiunadis svizzers, quai a Sedrun. Tranter auter stat sin il program la cursa da 50 kilometers en il stil classic.

audio
Livio Bieler e ses plans per l'avegnir
ord Sport ed actualitad dals 13.03.2021.
laschar ir. Durada: 2 minutas 57 Secundas.

Ironman Hawaii

Ils skis da passlung na sa tschentian uss però betg en in chantun. El vegnia era a far passlung en l’avegnir, di Livio Bieler. El quinta er da sa participar vinavant a cursas popularas sco il maraton da la Surselva u il maraton da l’Engiadina, simplamain cun pli pitschnas ambiziuns e finamiras. Ina finamira saja dentant da pudair ir, sche pussaivel cun 30, a la partenza dal Ironman da Hawaii, e quai ensemen cun ses bab Norbert Bieler, ch’è gia sa participà pliras giadas a quest triatlon extrem (3,86 km nudar / 180 km velo / 42,195 km currer).

Actualitad RTR;

Artitgels legids il pli savens