Ina medaglia al campiunadi mundial ad Oberstdorf, gist cun la staffetta, fiss in siemi.
Actualmain trena il currider da la Val Schons a Tavau. Sin ina la loipa da bun quatter kilometers al pe dal Flüela mola Baumann vid ils davos detagls en vista a la stagiun 2020/2021. Quella tegna pront divers puncts culminants. Sper il campiunadi mundial la fin favrer/entschatta mars vul Jonas Baumann far ina buna figura al Tour de Ski che cumenza il prim da schaner en la Val Müstair ed a las cursas da chasa a Tavau Nordic mez december.
La gronda finamira è da restar saun
Pervia da la crisa da corona poi dar midadas di per di en il chalender da cursas. Perquai vali da restar flexibel, uschia Jonas Baumann ch’ha dà ses debut en la cuppa mundiala il december 2009, pia avant 11 onns.
Vessi da dar pli paucas cursas pervia da la pandemia da corona avess jau dapli temp per la famiglia, e quai fiss era bel.
Jonas Baumann è dentant persvadì ch’i dat cursas da la cuppa mundiala ils proxims mais. Pervia dal virus saja simplamain da laschar adatg anc pli fitg e far il meglier pussibel da mitschar saun tras la stagiun, pertge in corp saun saja la finala lur chapital di il currider da 30 onns. Tuttina saja er d’empruvar da viver ina vita normala, pertge sa fugir dal tut da quest coronavirus na saja betg pussibel, uschia Jonas Baumann, il bab da famiglia che vegn dapi intgins onns titulà sco il numer 2 en Svizra davos il leader Dario Cologna.
