A la fin dad ina lunga stagiun d’enviern ha la passlunghista Fabiana Wieser da Sent stuì digerir ina pitra sconfitta. Senza previs ha la federaziun svizra da skis, Swiss Ski, bittà la giuvna passlunghista or dal cader. Medem sco Livio Matossi da San Murezzan, n'è er ella betg pli vegnida resguardada en il cader C. Sin in dretg argument daco ch’ella è vegnida bittada or dal cader spetga Fabiana Wieser anc oz.
Suenter l’emprima dischillusiun s’orientà da nov
La decisiun da Swiss Ski ha bittà a Fabiana Wieser enta letg. Gist suenter ina lunga stagiun nua che ses corp era gia al limit ha la decisiun da la federaziun svizra da skis anc procurà per il rest, Wieser ha survegni la grippa. Durant quel temp ha ella giu peda da far patratgs co ella vul cuntinuar. Spert era cler per la sportista da far vinavant. Ella è puspè vegnida part dal cader regiunal e da la classa da sport da l’Institut Otalpin a Ftan. Ella è quasi turnada en l' ambient ch’ella enconuscheva anc da ses temp da la matura.
Sport e scola da turissem
Sper il fatg che Fabiana Wieser è turnada en il cader da passlung regiunal è ella er s’annunziada per la scola da turissem a l’Academia Engiadina a Samedan. En la scola media ha ella chattà in sistem da scola che va fitg bain ensemen sun sia ambiziun da far sport. Fabiana Wieser ha survegni la schanza tar l’Academia da far la scola da turissem en blocs. Adina tranter la stagiun da passlung va ella a scola. Uschia sa ella cumbinar da moda perfetga il temp da scola cun temp da trenament e cursas da passlung. Fabiana Wieser ha propi decis da far in pass enavos, per pudair far ord questa posiziun il proxim pass enavant.
RR sportissimo 17:00